عمرك فكرت إن الأرقام اللي إتعلمناها من صغرنا بالإنجليزي وبالعربي ممكن يكون أصلهم مختلف؟ وإن ممكن يبقي أصل الأرقام الإنجليزية عربي؟ النهارده هنوضح القصة ورا الأرقام اللي في الأصل ابتكرها الخوارزمي بدلالات للزوايا، وإزاي بقت هي المستخدمة في اللغة الإنجليزية، وإزاي الأرقام اللي بنستخدمها دلوقتي في العربي أصلها من الهند.
عالم الرياضيات اللي يعتبر من أوائل العلماء في مجاله، ومؤسس علم الجبر، الخوارزمي، ابتكر الأرقام من ۱ لـ ٩ وكل رقم بيرمز لقيمته حسب عدد الزوايا في شكل كل رقم زي ما متوضح في الصورة، وده بسبب إن علم الرياضيات نفسه كان جديد فكان من الصعب تعلمه فابتكر الطريقة دي علشان تسهل تعلم الأرقام بشكل أبسط، أما بالنسبة للصفر فكان على شكل دايرة لإنها ملهاش زوايا، لكن لما الهنود استعملوه اختلط معاهم بالرقم ٥ فغيروا شكله للصفر المعروف دلوقتي باللغة العربية على شكل نقطة.
إزاي اتنقلت الأرقام دي لحد ما بقت المستخدمة في العالم كله؟ خلال تواجد عالم الرياضيات الإيطالي ليوناردو فيبوناتشي، في مدينة بجاية في الجزائر، عرف الأرقام العربية وهو صاحب الدور العظيم في إنتقال الأرقام العربية وانتشارها في أوروبا، بعد كدة انتشرت للعالم كله.
الغريب إننا في الأصل كعرب أبدعنا في الرياضيات، وعلمائنا اخترعوا الأرقام المستخدمة في العالم كله تقريبا دلوقتي، لكننا في الحقيقة بنستخدم الأرقام اللي في الأصل هندية وهي ۱ – ۲ – ۳ – ٤.. طب ده حصل إزاي؟ في البداية نشأت طريقة التدوين بنظام العد العشري في العالم من الهند، واتنقلت الأرقام الهندية في البداية لبلاد فارس، اللي نقلوها هما كمان لأنحاء الدولة العثمانية كلها اللي كانت الدول العربية وقتها تحت خلافتها، واتنقلت برضه للغرب بإسم ” الأرقام العربية”، ومن وقتها وإحنا بنستخدمها.