الأديب يوسف إدريس ابن قرية البيروم بمركز فاقوس، أمير القصة القصيرة، ولقب بـ “تشيخوف العرب” نسبة للروائي الروسي أنطوان تشيخوف، قرر يسيب مهنة الطب ويتجه للعمل الأدبي لحد ما بقى من أهم العلامات في مسيرة الأدب العربي والمصري. وفي ذكرى ميلاده، بنفتكره بأشهر أعماله الروائية.
النداهة
رواية (النداهة) من الروايات اللي اتحولت بعد كده لفيلم، وجسدت الفنانة ماجدة دور البطلة الرواية، بيتكلم عن الصراع الفكري بين المرأة الريفية لما تقرر إنها تسيب حياتها في القرية وتعيش في المدينة، الرواية هترصد صراع البطلة والصدمة الفكرية بين اللي اتربت عليه واللي هتلاقيه في القاهرة وحياة المدينة.
العيب
بتتناول قضية فلسفية والصراع بين الحرام والحلال، بتدور حوالين ثلاث بنات هيواجهوا المجتمع بعد تخرجهم وبعد ما ينخرطوا في حياة الشغل، هيشوفوا مجتمع جديد عليهم وهينصدموا من اللي اتربوا عليه وطلعوا لاقوه، الرشوة والتزوير والمحسوبية هيبقوا متاحين قدامهم، وهما في حيرة بين المفروض والصح وبين بيع المبادئ بسهولة.
العسكري الأسود
رواية بتمزج بالواقع والخيال، بتدور أحداثها حوالين شاب مثقف كل همه إنه يغير الواقع بتاعه، لحد ما يحصل له اللي هيغير حياته بس بشكل أقسى مما كان يتخيل، هيتم اعتقاله فجأة دونَ سابقِ إنذار، وفي المعتقل مش بس الكرباج اللي هيغير معالم جسمه، ولكن كمان شخصيته وفكره وثوابته.
الحرام
الرواية بتتناول جوانب الظلم الاجتماعي اللي بتعيشه طبقة مهمشة من طبقات المجتمع، وبين نظرة المجتمع من إن الحرام اللي وقعت فيه بطلة القصة في دائرة حرام أكبر من اللي بيعمله أهل البلد مع الفقراء، نظرة مزدوجة بيطرحها الكاتب في روايته.
الكاتب يوسف إدريس معروف عنه إن معظم كتاباته كانت بتجسد معاناة المرأة، وخصوصًا المرأة الريفية، وكان بيحرص إنه يظهر تفاصيل حياتها ومعاناتها.