بجانب الأوقات السعيدة والممتعة اللي بنعيشها في الصيف من سفر ونزول البحر والـ pool، بييجي مع المصيف بعض الحاجات الخطيرة اللي بدأنا نكتشفها مؤخرًا. من فترة قصيرة شوفنا منشور ملأ صفحات السوشيال ميديا عن الطفل اللي توفى بعد نزوله حمام السباحة بـ 4 أيام. مصطلحات زى الغرق الجاف والغرق الثانوي بدأت تثير رعب وقلق الناس. قصص زى دي بتكون مخيفة، ولكنها نادرة في نفس الوقت.. وعلشان ننشر الوعى أكتر ونحمي أطفالنا من التعرض لقدر الله للنوع ده من الغرق، لازم نوضح المصطلحات دي ونشرحها بالتفصيل، واللي جمعنا تفاصيلها من الأبحاث طبية وكلام المتخصصين.
الفرق بين الغرق الجاف والغرق الثانوي
الغرق الجاف بيحصل لما يستنشق الطفل كمية كبيرة من الماء من خلال الأنف أو الفم (في حالة إن الطفل كان قرب يغرق) ، واللي بيؤدي إلى إغلاق مجرى الهواء كرد فعل دفاعي من الجسم على الرغم من أنه لا يصل إلى الرئتين، وبالتالي بيحصل تشنج في مجرى الهواء وصعوبة في التنفس. وبيُطلق على الغرق اسم “جاف” لأن المياة مش بتدخل الرئتين بسبب تشنج (إغلاق منعكس) للأحبال الصوتية، فبيُحرم الجسم من الأوكسجين، ويبدأ الطفل بالاختناق .
أما الغرق الثانوي أو “المتأخر” فبيحصل لما يستنشق الطفل الماء وتدخل للرئة ، واللي بيسبب التهاب أو تورم. وممكن الالتهاب ده تظهر أعراضه بعد ساعات أو حتى أيام من وقت نزول المياة. فبيعود سبب الوفاة من الغرق المتأخر لتورم الأكياس الهوائية الصغيرة في الرئتين ، واللي بيمنع الأكسجين من دخول مجرى الدم.
بإختصار، الوفاة بتحصل بسبب نقص الأكسجين، والسائل في الرئتين بيسبب تقلصات في الشعب الهوائية وبالتالي عدم قدرة الأكسجين على الوصول إلى الرئتين. وده اللي خلى بعض الدكاترة ما يستعملوش مصطلحات زى الغرق الجاف أو الثانوي لأن بالنسبالهم الوفاة بتحصل بسبب نقص الأكسجين.
ايه هي الأعراض؟
أعراض الغرق الجاف بتظهر ممكن بعد دقيقة واحدة من حادث الغرق الوشيك، ولكن الغرق الثانوي ممكن تظهر أعراضه بعد ساعات أو حتى أيام والأعراض بتكون كحة شديدة وترجيع، الكسل الشديد وكثرة النوم، وكمان الشعور بآلام في الصدر وزرقان في لون الجلد وطبعًا وجود صعوبة في عملية التنفس.
ازاى نتجنب حدوث النوع ده من الغرق؟
من الحاجات الأساسية اللي لازم نبدأ بيها هو مراقبة الأطفال بشكل مستمر أثناء وجودهم في حمام السباحة لتقليل نسبة حدوث أى حوادث غرق. وفي حالة حدوث حاجة زى دي وتم إنقاذ الطفل، مراقبة الطفل والتأكد من عدم شكوته من أى من الأعراض اللي اتكلمنا عنها فوق، بالإضافة لزيارة طبيب ووضع الطفل تحت العناية الطبية في أول 24 ساعة، للتأكد من عدم إصابة الرئتين بأى نوع من أنواع الضرر.