جميلة عوض ممثلة مصرية، اتولدت في 6 أبريل سنة 1991 وسط عيلة فنية، فوالدها هو المخرج السينمائي عادل عوض، ووالدتها الفنانة الممثلة اللبنانية راندا، وجدها هو الفنان الكبير محمد عوض، درست الإعلام في جامعة أكتوبر للعلوم الحديثة والآداب MSA، وهي مهتمة بقضايا المجتمع والسياسة، وشاركت في حملة اليونيسيف للتوعية عن حقوق الطفل عالميًا وفي الوطن العربي.
جميلة عوض شاركت في أول مسلسل ليها “تحت السيطرة” في سنة 2015، اللي عملت فيه دور “هانيا”، والدور ده لفت الأنظار ليها وخلى الكل يتكلم عن أداءها وموهبتها، وكمان شاركت في مسلسل “لا تطفئ الشمس” اللي حقق نجاح ونسبة مشاهدة كبيرة في رمضان 2017، وشاركت في أعمال تانية كتير زي “جريمة شغف”، و”لف ودوران”، و”من 30 سنة”، و”هيبتا”، و”الضيف”، و”سبع البرمبة”، و”بنات ثانوي”.
شاركت الفنانة الجميلة مؤخرًا في مسلسل “إلا أنا”، وهو مسلسل مكون من 6 حكايات مستوحية من الواقع وليها علاقة بقضايا المرأة، وكل حكاية ليها مخرج، ومؤلف، وأبطال، و10 حلقات. وحكاية “لازم أعيش” للمخرجة مريم الأحمدي ومن تأليف نجلاء الحدينى، وبطولة جميلة عوض اللي عملت فيه دور بنت مصابة بمرض البهاق الجلدي. وبعد عرض الحلقة، نزلت الفنانة منشور عبر حسابها على موقع انستجرام بصورة ليها بمكياج بيوضح مرض البهاق، بتدعم فيه كل اللي عندهم المرض ده، وكمان علشان تروج للمسلسل.
