أعلن مهرجان القاهرة السينمائي عن تكريم كريم عبد العزيز بجائزة فاتن حمامة التقديرية عن مشواره الفني اللي استمر 20 سنة، الجائزة دي بتقدم لكبار الفنانين على مجمل أعمالهم واللي سابت أثر في الجماهير على مستوى الصناعة كلها سواء مخرجين أو ممثلين أو مؤلفين، وكريم عبد العزيز ماكانش أول واحد ياخد الجائزة كان في مجموعة من الفنانين سبق واتكرموا بيها وللسبب ده حبينا نفتكرهم.
سمير غانم
أخد الفنان الراحل سمير غانم جائزة فاتن حمامة التقديرية في مهرجان القاهرة الدولي السينمائي في دورته الـ39، واللي قام بتسليمه الجائزة بناته إيمي ودنيا. فنان يستحق مليون تكريم لإنه كان له دور في تغيير مسار وسكة الكوميديا في مصر.
هند صبري
أخدتها هند صبري في نفس الدورة اللي أخدها فيها الفنان الراحل سمير غانم، عن مجمل أعمالها اللي علمت مع الناس من أول ظهورها على الشاشة.
منى زكي
أخدتها منى زكي في الدورة الـ42 لمسيرتها الفنية اللي كان فيها تنوع في الأدوار وحرفية عالية في التمثيل. وآخر دور مميز ليها كان دور “هنا” في لعبة نيوتن.
ماجد الكدواني
ماجد الكدواني في أخر فترة ظهرت موهبته المستخبية من خلال أعمال مهمة كانت بتتسند له، واللي أظهرت قدرته على التلون في أدوار الكوميديا والتراجيدي، ومن أخر أدواره المميزة اللي علقت معانا دوره في فيلم هيبتا وفيلم 678 ومسلسل ولاد ناس اللي كان في رمضان اللي فات.
حسن حسني
كان له بصمة مميزة في كل عمل فني له، بالرغم إن معظمها ماكانتش أدوار بطولة بس من غيره العمل ماكانش هيكمل، ده غير إيفيهاته اللي معلقة معانا زيّ فيلم الباشا تلميذ وفيلم غبي منه فيه.
كلهم فنانين يستحقوا التكريم لإنهم ببساطة خلوا حياتنا أحلى، حتى لو في منهم مش عايشين معانا دلوقتي بس أعمالهم لسه محفورة في ذاكرة السينما وهنفتكرهم كل لما نشوفها.