من فترة انتشرت أخبار عن عرض مسرحية بودي جارد على منصة شاهد، المسرحية اللي بنسمع عنها من وإحنا صغيرين وفضلت تتعرض لفترة حوالي 10 سنين، لكننا ماشوفناهاش على التلفزيون زيّ باقي المسرحيات اللي اتربينا عليها من أول مدرسة المشاغبين للعيال كبرت وغيرها، والسبب ورا إنها ماتتعرضش كانت مشاكل إنتاجية أدت في النهاية إن المسرحية بقت في الدرج، لكن بعد السنين دي كلها، أخيرًا المسرحية اتعرضت، لكن آراء الجمهور اختلفت عليها، وفيه آراء كتير قالت على أخطاء في المسرحية سواء مهنية أو أخلاقية، وناس قالت إن ده النقد ده طبيعي خصوصًا إن المسرحية بتطلع للنور بعد سنين مش قليلة من عرضها، تعالوا نشوف الناس إيه رأيها.
وكان فيه انتقادات لوجود محتوى مهين للمرأة وإيحاءات جنسية.
وكتير شافوا إن الإفيهات طبيعي ماتكونش بتضحك لإن فات عليها وقت كبير، ودافعوا عن فكرة العرض دلوقتي.
ووضح تركي آل شيخ إن مشاهدات مسرحية بودي جارد في اليوم الأول من عرضها عدت النص مليون مشاهدة، وإنها بقت تريند في وقت قليل جدًأ.
بغض النظر عن الآراء سواء الإيجابية أو السلبية، السؤال هنا هل فكرة إننا نشوف عمل فني بعد سنين من تنفيذه، فكرة صح ولا غلط، من ناحية ثقافتنا بتتغير خصوصًا الكوميدية، وكل يوم بيظهر مواقف وإفيهات جديدة، لدرجة إننا لو كررنا إفيه انتشر من شهر، بنقول إيه ده ياعم انت قديم أوي، بس في نفس الوقت، فيه كوميديا عايشة معانا من وإحنا صغيرين، ولسه لحد دلوقتي كل ما نشوفها نضحك كأنها أول مرة، هل ده فعلًا بيرجع لفكرة إننا علشان شوفناها على مدار سنين وفي فترة طفولتنا فبقت جزء مننا؟ ولا الكوميديا نفسها بتفرق؟
بس لازم نبص لإيجابية ناحية الفكرة دي، أكيد لما نسمع إننا هنشوف عمل فني يخرج للنور بعد سنين، هتكون عامل جذب جوانا وتشويق للحاجة دي وإننا نستكشفها، وهنكون متشوقين نعرف العمل الفني ده، بس هل أنهي جانب منهم هو اللي يكسب؟