منشور كتبته الممثلة منى فاروق، موجه لنقابة المهن التمثيلية وخصت فيه الفنان أشرف زكي، بتناشدهم بإسناد أي عمل ليها.
“مساء الخير .. الكلام اللي بقوله ده خارج خالص عن فكرة إني أخد التريند .. أنا قلت أعتزل الفن لسبب واحد وهو إن ده مصدر رزقي الوحيد اللي أنا بحبه وعايزة أشتغله، لكن لما أوصل لمرحلة إني مش عارفة أدفع إيجار بيتي حاجة تتعب.. أنا محتاجة أشتغل عشان أقدر أعيش زي أي بني آدمة طبيعية.. أنا غلطت وربنا بيسامح.. ليه البني آدمين مش عايزين يسامحوا؟ أنا بسمع بودني بلاش منى عشان الفيلم مايتضرش، ليه أنا بقيت منبوذة من كل الناس؟”.
” المجتمع حاططني في المكان الوحش بس مش يمكن عايزة أبقى كويسة زي أي واحدة؟ ليه بتقفلوا قدامي كل حاجة؟” .. ولما قلت قرار أعتزل من أجل لو حد شافني بشتغل في محل لبس أو أي شغل ميقولش إيه ده؟ والله مش طالبة غير أشتغل .. عايزة أشتغل أبوس إيديكم”.
سبب التصريح هو فيديو انتشر من خمس سنين لمنى فاروق وشيما الحاج في أوضاع غير لائقة وكان برفقتهم المخرج خالد يوسف، وبالرغم إن الممثلتين أخدوا عقابهم بعد القبض عليهم وسجنهم وخرجوا بكفالة بعدها بفترة، عانوا من كلام الناس خصوصًا منى فاروق، وهددت بالانتحار بسبب نظرات المجتمع في حين إن المخرج خالد يوسف سافر وقتها على فرنسا وقيل إنه هرب. ورجع من فترة واشتغل وقدم مسلسل شارك في موسم رمضان.
ولكن بالنظر لـ2023 والنظر للسيناريوهين، المفترض إن الطرفين قدام القانون والمجتمع مدانين، ولكن لو بصينا على حياة خالد يوسف بعد القضية هنلاقي إنه رجع بعدها من فرنسا واستقبلوه وسط ترحيب كبير واحتفال واسع من الفنانين، وأقدم على أعمال ونجاحات كان آخرهم مسلسل سره الباتع، بجانب مشاركته في فعاليات ومهرجانات، وعلى الجانب التاني منى فاروق لسه فئة من المجتمع مش قادر يتقبلها وهي دايمًا بتصرح بده وبنشوفه في تعليقات الناس.
وبغض النظر عن شكوى منى النهارده، هل شايفين إن في ازدواجية في المعايير في تقبل أخطاء الطرفين، واحد منهم على حساب التاني؟ ليه في فئة لحد وقتنا هذا مش قابلة إنها ترجع تاني لحياتها في حين إن الطرف التاني قدر يكمل حياته؟ طب ليه ماحصلش تضامن معاها زي الطرف التاني؟ ومن قبله كان عمرو وردة وسعد المجرد؟ هل شايفين إن السيناريوهات متكررة؟
هل المشكلة منها في تعاملها مع الموضوع بعد رجوعها للأضواء؟ هل ماعرفتش ترجع تكسب الناس تاني زي ما غيرها عمل؟ ولا القضية إنه راجل وهي الست؟
ولو احنا كمجتمع شرقي مش متقبل الفعل وزي ما بيتقال “متدين بطبعه”، ليه ماطبقناش غضبنا على الطرف الاخر وسامحناه بالسرعة دي؟ مش المفترض إن المساواة في الظلم نوع من أنواع العدل؟ .. أسئلة كتير مش واضحة ومش لاقين لها رد.