من حوالي شهرين انتشر على مواقع التواصل الاجتماعي هاشتاج #مغتصب_حفر_الباطن بعد انتشار فيديو بيوثق حادثة اغتصاب لطفل من شخص، وصحابه ساعدوه ينفذ جريمته ويقوم بتصويره داخل خيمة بمحافظة حفر الباطن، واتقبض عليهم ولسه التحقيقات شغاله معاهم. وللأسف، اتكررت حادثة مشابهة في الفترة اللي فاتت، بس المرة دي تم صدور حكم الإعدام على المجرمين.
ويوم الأحد اتنفذ حكم الإعدام في المدينة المنورة، على المجرمين علي عبد المجيد بن مرزوق وعيد بن بخيت بسبب اختطافهم لطفل في منطقة بعيدة عن النطاق العمراني، والاعتداء عليه بالضرب وبعدها تم اغتصابه بالقوة تحت التهديد. وفي بيان لوزارة الداخلية، قالت نصًا إنه اللي عملوه “فعل فاحشة اللواط”، والتحقيقات انتهت بثبوت إدانتهم وتم التأييد على الحكم من محكمة الاستئناف ومن المحكمة العليا، وبعدين تم صدور أمر ملكي وتنفيذه وفقًا للشريعة.
وفي واحدة من القضايا المشابهة اللي عملت ضجة في السعودية؛ اغتصاب طفلة من تلات مجرمين وعمرهم ماتجاوزش الـ16 سنة، وتم صدور الحكم ضدهم، واحد بالإعدام لإنه اغتصبها تحت تهديد السلاح والاتنين التانيين بالسجن والجلد.
وحصلت في السعودية كملن حادثة اغتصاب لبنت عندها 15 سنة، تم اغتصابها من أخوها اللي من جهة الأب، لإنها بتسكن مع والدها ومراته ومش عايشة مع والدتها، واتعرضت للتهديد من مرات أبوها لو قالت عن اللي بيحصل لها! وفضلت ساكتة كده لسنتين! سنتين بتتعرض فيهم الطفلة لأذى نفسي وجسدي ومش عارفة تقول لمين! وده للأسف اللي بيحصل في أغلب حوادث اغتصاب الأطفال، الحوادث بتحصل في البيوت وبتستمر لسنين من غير ما حد يعرف عنها حاجة!
وبناءً على تصريح رئيس لجنة الشئون الاجتماعية والأسرة والشباب في مجلس الشورى، ثامر الغشيان، مجلس الشورى أقر قبل سنتين نظام خاص بالطفل اسمه “نظام حماية الطفل”، ومن ضمن نصوصه معاقبة أهل الضحية في حالة تسترهم على اللي حصل ولو مابلغوش الجهات المختصة من باب إنهم خايفين من الفضيحة زيّ ما بيقولوا! والتستر ده بيسبب للضحية مشاكل نفسية، لإنها مش عارفة تجيب حقها فوق المشاكل اللي اتعرضت لها والصدمة بسبب حادثة التحرش أو الاغتصاب، وخصوصًا لو حصل الاغتصاب من حد من العيلة!
حوادث اغتصاب الأطفال في السعودية نسبتها مش قليلة ومعظمها مسكوت عنها، إلا في الحالات اللي بتتوثق بفيديو وبتتعرف. محتاجين دعم الأهل أولًا وقبل أي حاجة، خصوصًا في حوادث اغتصاب الأطفال.