امبارح كانت آخر مباراة تتلعب على استاد 974 القطري في كأس العالم 2022، اللي كانت بين البرازيل وكوريا الجنوبية، لكن ليه دي آخر مباراة تتلعب عليه وكأس العالم لسه ماخلصش؟ وإيه مصير الاستاد ده؟ وليه اتسمى 974؟
كل الإجابات عن الأسئلة دي هنقولها مع تفاصيل عن الاستاد الغريب اللي بيودع المونديال.
الملعب الأول من نوعه
يُعتبر ملعب 974 أول ملعب قابل للتفكيك بالكامل في تاريخ كأس العالم، واللي حصل على شهادتين المنظومة العالمية لتقييم الاستدامة، الملعب اتشيد باستعمال حاويات الشحن، وباستخدام مواد أقل في البناء من الملاعب التقليدية، وبيتسع لـ 40 ألف مشجع.
الفكرة من ملعب 974 كانت تجنب بناء كتلة أسمنتية، علشان الأضرار الاقتصادية التابعة لده، ولإن بعد انتهاء كأس العالم، الكتلة الأسمنتية هي اللي هتفضل مستمرة وهتكون بدون استخدام زي ما حصل في بطولات سابقة، وده تفكير مواكب للتطورات اللي بيشهدها العالم والتفكير بشكل إيجابي.
الملعب موجود بالقرب من ميناء الدوحة التاريخي، وعلى بُعد دقائق من مطار حمد الدولي، وهو أقرب ملاعب كأس العالم من المطار والميناء، وده يسهل الوصول إليه للقادمين عبر الجو أو البحر.
سبب اسم 974
الملعب اتسمى بالاسم ده لسببين، لإنه على اسم رمز الاتصال الدولي لدولة قطر، وكمان لإن ده عدد الحاويات اللي تم استخدامها لبنائه، وهو ملعب لا يحتوي على أجهزة تكييف، ويستضف المباريات المساء فقط لانخفاض درجات الحرارة.
مصير الملعب بعد توديع المونديال
قطر هتتبرع بالاستاد كامل لإحدى الدول الصديقة اللي تحتاج له، لكن لحد دلوقتي لم يتم الإعلان عنها بشكل رسمي.
لكن كان في أخبار وكلام من السنة اللي فاتت عن إن تونس أخدت الموافقة المبدئية للحصول على الملعب بعد المونديال، لكن مافيش أي أخبار بتؤكد أو بتنفي الكلام ده، ولا أحاديث عن الدول المحتملة. لكن قطر أكدت إن اللي هتحصل عليه هتكون دولة محتاجة له، وكمان ماتمش الإعلان عن معاد محدد لتفكيك الاستاد لحد دلوقتي.
ملعب 974 ممكن يتم إعادة توجيهه لبناء ملعب بنفس الحجم في أو عدد من الملاعب الأصغر، وهيتم إعادة الاستفادة من الحاويات والمواد المستخدمة في بناءه لصالح الدول اللي بتفتقر لبنية تحتية رياضية.