بالصور: سوق الحميدية، أفضل ما في مدينة دمشق
مدينة دمشق السورية هي أقدم مدن العالم وأكترهم استمرارًا في الأُهول بالسكان عبر التاريخ. المدينة العتيقة أصبحت حاليًا معترف بيها لدى منظمة اليونسكو كإحدى مناطق التراث العالمي. المثير في الموضوع إن المدينة ماتغيرتش كتير على مدار الألفيتين الأخيرتين، لسه بتحيطها الحوائط العتيقة اللي بناها الإغريق والرومان وحضارات أخرى اعتبرت دمشق موطن ليها.
أما عن سوق الحميدية، فهو بلا منازع أكبر أسواق سوريا وأهمها، بيقع في قلب المدينة العتيقة بجانب قلعة دمشق. السوق طوله يتعدى ال600 متر وعرضه حوالي 15 متر، وعلى جانبيه الاتنين هتلاقي العواميد الطويلة وأكبرها هو القنطرة أو القوس اللي بيعلو السوق ب10 أمتار وبيوفر حماية للناس من حرارة الشمس. السوق حاليًا فيه عدد كبير من الكافيهات ومطاعم صغيرة لبيع الآيس كريم زي مطعم “بكداش” الشهير اللي بيعمل “بوظة عربية” من سنة 1890. عادة ما بييجي السياح مخصوص عشان يجربوا الآيس كريم الخاص بيهم اللي بيعملوه بماء الورد والسحلب والقشدة والفستق الحلبي.
السوق كمان عنده محلات أقمشة وملابس وسجاد، بالإضافة لمحلات بيع العطور والتوابل والحلويات السورية وحتى الصابون الحلبي. انزل تحت في الصور وهتشوف مدى جمال سوق الحميدية وألوانه المُبهجة.
