مسرح سيد درويش هو ثاني أكبر مسرح بعد دار الأوبرا المصرية في القاهرة؛ اتبنى المسرح سنة 1918 في عهد الملك فؤاد الأول في نهاية الشارع اللي بيحمل اسم الملك فؤاد بمحطة الرمل. والمسرح تم افتتاحه سنة 1921 باسم تياترو محمد علي بتصميم مستوحى من أوبرا فيينا، ومسرح أوديون في باريس على يد المهندس الفرنسي جورج بارك.
المسرح متزين بزخارف أوروبية كلاسيكية الطابع، وبتوصل سعته لـ 1000 مقعد، وبتبلغ مساحته الكلية 4200 متر مربع. وعلى الرغم من تغيير اسمه للموسيقار المصري سيد درويش سنة 1962 تخليدًا لذكراه، واعترافًا بدوره فى عالم الموسيقى العربية، اسم محمد علي لسه موجود على اللوحة التأسيسية للمسرح لحد دلوقتي.
تم إدراج مبنى المسرح تحت قائمة التراث المصري سنة 1999، وبدأت من بعدها عمليات مكثفة لتجديده، وترميمه بعد سنوات من الإهمال، لحد ما أُعيد افتتاحه للجمهور سنة 2004.
ومن سنة 2004، والمسرح بيشهد عروض متنوعة لفرق مصرية وعالمية كتيرة زي أوركسترا القاهرة السيمفونى، وأوركسترا الحجرة لأوبرا الإسكندرية، وفرقة أوبرا الإسكندرية للموسيقى والغناء العربى، والفرقة القومية العربية للموسيقى، وده بالإضافة لحفلات النجوم وفرق الغناء العربية.
