سمعنا مؤخرًا عن حادثة حزينة وموجعة بكل المقاييس، موظف شاب انتحر من الدور التالت بسبب تعرضه للتنمر من قبل مديره وإجباره على الاستقالة وهو عليه ديون! تخيلوا الشاب ده ازاي تعرض لكم من الضغوطات في شغله؟ ضغوطات خلت ملجأه الوحيد هو الانتحار! ازاي ممكن يبقى في شخص سبب في أذى شخص تاني نفسيًا بالشكل ده!
وفي مداخلة هاتفية من زميلة الشاب مع عمر أديب، بتقول إن السبب اللي خلى مديره يهدده بالرفد ويدي له كارت أحمر إنه هيمشي، هو إنه بيدخل الحمام كتير بسبب ظروف صحية! وده طبعًا بالنسبة له بيعطل سير الشغل وبيخسر فلوس! يعني وصل به من مستوى إنعدام الإنسانية والضمير إنه يهدد موظف عنده للسبب ده! لإن كل همه هو تحقيق التارجت، فلازم يدوس على الموظف اللي تحته ومش همه إن الشخص ده إنسان زيّه عادي وعنده طاقة ممكن تخلص! وماكتفاش بكده وبس، لأ ده كمان قرر إنه لازم يمشيه من المكان كله! برغم إنه عارف إن عليه ديون!
مفهوم القيادة في أي وظيفية هو إنك تحتوي الناس اللي بيشتغلوا معاك، تعرفهم غلطهم بذوق ورحمة لو كانوا غلطانين مش تدوس عليهم وتهددهم بالمرتب اللي بياخدوه منك! لكن حتى اللي عمله الموظف لا هو غلط ولا الطريقة اللي اتعامل بها كانت إنسانية أو فيها شيء من الأدمية!
للأسف الحياة عمومًا بقت محملة بكم من الضغوط بشكل مش طبيعي، الناس بقت تحس إن الوقت اللي معانا قليل أوي واللي مطلوب مننا كتير أوي! الضغط العصبي والنفسي ممكن يخلي الواحد ينفجر في يوم! وللأسف في ناس لسه مش عارفة تراعي شعور الناس اللي حوليها، لأ وبتضعط عليهم كمان.
وللأسف مش دي الحادثة الأولى اللي تحصل في المكان ده Teleperformance، بعد لما الموضوع ده اتعرف بدأت قصص كان مسكوت عنها تظهر للنور، وبتقول قد إيه ده مكان مسموم وغير صالح للعمل فيه بطريقة أدمية!
ازاي ممكن تدفع بيئة العمل السامة لمشاكل نفسية؟
في دراسة اتعملت عن بيئة العمل السامة وازاي ممكن تأثر مش بس على إنتاجية الموظف أو تخليهم مش مبسوطين في المكان، لأ دي الدراسة أثبتت إنها بتأثر كمان على صحة الشخص العقلية! وفقًا لموقع study finds الأمريكي إنه الأجواء العدائية وبيئة العمل الغير صالحة ممكن تزيد من خطر الإصابة بالاكتئاب بنسبة ممكن توصل لـ300%!
بيئة العمل الغير صالحة ممكن يكون المدير بيمارس سلطاته بطريقة سيئة بشكل يسبب لك أنت أذى نفسي، أو الموظف ممكن يكون بيتعرض للتنمر في المكان اللي هو فيه أو مفيش تواصل بين المدير والموظف علشان يعرف احتياجاته النفسية، كلها أسباب ممكن تخلي الشخص يقرر إنه يسيب المكان اللي هو فيه، وللأسف في ناس ممكن تقعد وتستحمل في المكان بسبب الضغوط المادية اللي هي فيها، يعني بيبقى عندها ضغوطات مادية ونفسية كمان!
وفي دراسة تانية اتعملت في الأردن بتقول إن 30% من الحالات المصابة باضطرابات نفسية حول العالم سببها هو بيئة العمل! وفي دراسة تانية في الصين اتعملت بتقول إن أكتر من مليون شخص سنويًا بيموت بسبب إرهاق العمل! وبين سنة 2008 و 2014 انتحر أكتر من 46 موظف في France Telecom ده غير البلاغات عن حوادث العنف اللي بتتم في المكان!
ماحدش هيعرف يعيش بذنب لو كان سبب في أذى حد نفسيًا، فهونوا على بعض الطريق لإننا بشر مش آلات!