من امبارح انتشر هاشتاج “الولاية حقي” على السوشيال ميديا، بقصص كتير لستات مش عارفة تقوم بأبسط حقوقها كأم أو حتى كإنسانة بإن يبقى ليها الولاية على نفسها أو على أولادها بحاجات بسيطة جدًا زيّ إنها تفتح لأولادها دفتر توفير أو إنها تاخد ملف أولادها من المدرسة كـ “ولي أمر”، حاجات بسيطة كتير بتتعقد لأسباب ولاية مش مفهومة، ولما بيحصل حوادث بنشوف فيها المجتمع بيتعامل مع المرأة إزاي زيّ اللي انتشروا في الفترة اللي فاتت، بينفجر مشاكل وقضايا كتير تانية بتعاني منها الستات، والهاشتاج ده بيبين جزء منها.
المعاناة مش بتقتصر على اللي شايلة بيتها وأولادها بعد خلافات مع الزوج، أو وفاته، أو المشاكل حتى اللي بتكون بعد الطلاق أو للخلافات الزوجية، الموضوع حتى بيقيد تصرفات الأم والزوجة حتى في وضع إنها عايزة تخلص خدمات لأولادها والزوج مش موجود بسبب إنه مسافر أو أي سبب تاني لكنهم على مودة ورحمة، مابالكم باللي بينهم خلافات؟
ادخلو على الهاشتاج وشوفوا قصص كتير الستات بتحكي فيها مواقف تبان بديهية جدًا لكنها للأسف مش من حقها، بنتمنى وسط ما بنحاول نغير دلوقتي كل حاجة للأحسن، إننا نغير النظرة دي ونشوف الحاجات اللي تبان بديهيات معيشة دي تتحل إزاي.