الممثل الجزائري الفرنسي طاهر رحيم هيلعب دور البطولة في فيلم «She Came To Me» الكوميدي الرومانسي لكاتبة السيناريو والمخرجة ريبيكا ميللر. وبتشاركه البطولة آن هاثاواي، وهيتم بدء تصوير الفيلم في نيويورك في الخريف اللي جاي، وبعد الفرصة العظيمة دي، تعالوا نتعرف أكتر على طاهر، الممثل الفرنسي من أصل جزائري، وازاي كانت بدايته ووصل للبطولة دلوقتي في هوليوود.
طاهر رحيم اتولد سنة 1981 في مدينة بلفور في فرنسا، لكنه من أصول جزائرية، وفي فترة مراهقته كان بيدور على شغف يخلصه من الملل، وهو بطبيعته بيحب المغامرة، لكن بلفور ماكانتش مشجعة لطموحاته، فاكتشف حبه للتمثيل وهو عنده 15 سنة، واتبع شغفه في السينما من خلال مشاهدة الأفلام ومتابعتها في السينما أول بأول، وبعدها درس التمثيل، وقدر يجمع بين شغفه ودراسته في المجال اللي بيحبه، وبعدها سافر لباريس علشان يلاقي مستقبل أحسن هناك.
أول تجربة له في التمثيل كانت مع سيريل مينيجون في Tahar l’étudiant، وده فيلم وثائقي فرنسي، تم إنتاجه في ٢٠٠٥. لكن البداية الحقيقية لطاهر كانت في ٢٠٠٩ مع فيلم A Prophet (نبي) واللي قام فيه بالدور الرئيسي، وفاز بالجائزة الكبرى في مهرجان كان السينمائي، وكمان حصل على 9 جوائز تانية، منهم أفضل ممثل صاعد، ده غير الإشادة الكبيرة من النقاد لطاهر. وبعدها انطلق طاهر في مجال التمثيل وشارك في عدد من الأفلام والمسلسلات اللي تعتبر علامات ومحطات مهمة في حياته، لحد وصوله للبطولة في هوليوود.