أغاني البوب العربي شكلت الـ mainstream في المزيكا المميزة للشرق الأوسط لفترة طويلة قبل ما تكتسح ساحة المزيكا أغاني الراب والتراب والمهرجانات الشعبية واللي خلال الكام سنة اللي فاتت قدرت تتحول للـ mainstream الجديد في المزيكا العربية.
بس لسه أغاني البوب لها مكانة كبيرة في قلوب العرب ولسه ذوقهم الموسيقي بينجذب لها، ولإن معظم أغاني البوب بتتكلم عن علاقة حب ما بين اتنين وحالاتها ما بين لقاء وفراق وشوق وخيانة ووجع وقلوب مكسورة، قررنا نكتب عن أغاني بتقدم نفسها على إنها أغاني حب لكن لو ركزت في الكلمات ووزنتها بالعقل ممكن تحس إن اللي بيتقال ده كلام توكسيك عن علاقة بايظة وكان لازم تنتهي بهدوء علشان الطرفين بيؤذوا بعض بشكل ما.
يلا نشوف كام حاجة كده من الأغاني العربي التوكسيك!
أنغام.. أكتبلك تعهد
هي الأغنية حلوة أوي بس يبان إن دي واحدة عاشت علاقة توكسيك مع واحد abuser كانت بتحبه جدًا، وخارجة من العلاقة ماعندهاش أي ثقة في النفس أو في الأخريين ومش طايقة حياتها ولا عايزة تسمع عن الحب والمشاعر تاني، فقالت له سيبني في حالي وأنا هكتبلك تعهد مني إني أعيش لوحدي باقي عمري..
الكلمات زودت جرعة الدراما شويتين، في حين إنه في الواقع لو في واحدة كانت في علاقة وحشة أوي للدرجة دي المفروض تفركش أو تطلق أو ترفع قضية خلع وتاخد كل حقوقها وتـ move on، لكن ليه تكتبله تعهد إنها هتعيش باقي العمر وحيدة فريدة؟ مفيش منطق يعني.
أصالة.. شامخ
المزيكا حلوة أوي والكلمات فيها معنى، زيّ كلمات أغاني خليجي كتير مؤخرًا، الأغنية بتتكلم عن واحدة مجروحة بتقول: “جروح وجارحي مسموح لا أشره ولا أحكي، وإلا مني سمعت الجرح إذا بشكي يعاتبني.”
ومع دمج الكلمات دي مع فيديو كليب كله أبيض في أبيض زيّ مايكون مستشفى، وفي محلول ملح وكانيولا وواحدة عندها هستيريا، الموضوع اتحول لأذية كبيرة لدرجة إنها احتاجت مساعدة طبية ومش أي مساعدة طبية، دي مساعدة طبية من المستشفى كمان.
أنغام.. بتحبها ولا
“بتحبها ولا بتفكرك بيا؟ هي أنا ولا جايز أنا هي؟”
“مختارها نفس الروح، نفس العيون واللون”
“كل اللي شافها قال توأم شبهنا خيال، صورة وصوت ليا”.
الكلمات بتقول إن في واحدة عندها مشكلة كبيرة في الـ moving on، اللي هو الرجل في علاقة جديدة والست بتحبه “روحها في هواك بتدوب”، ولكنها لسه عايزة تدور على إثبات إنه لسه بيحبها فبيدور على اللي شبهها، رغم كل الحاجات اللي قدامها واضحة وبتثبت العكس.
هشام عباس.. قول عليا مجنون
“هتقولي امشي.. مش همشي
هتجيب لي حد يقولي امشي.. مابمشيش”
“قول عليا مجنون.. قول عليا موهوم..”
ولكن ده لا يعتبر جنون ولا وهم، كده أنت stalker وممكن نبلغ عنك البوليس، ونصيحة لأي بنت حد يعمل معاها كده: غيري اسمك ورقم تليفونك وعنوانك واهربي، دلوقتي، قومي اجري.
أمال ماهر.. في إيه بينك وبينها
“عايز تبعد ماتبعد واجرح قلبي وعينيا خوني مع واحده غيرها مش أقرب واحدة ليا، سيبها في جرحي تواسيني بلاش تحرمني منها”
“ومين هيحس بيا لو هرضى بجرح قلبي بلاش بإيديها هي”
قصة الأغنية عن واحدة بتكتشف إن أعز صاحباتها على علاقة بحبيبها أو جوزها وبتشرح الألم اللي بتحس بيه بعد ما تعرف الحقيقة دي، ورغم إن الفكرة دي صعبة أوي وتوكسيك أوي، لكن الكلمات الجميلة والعميقة قدرت تنقل إحساسها بجد، ومع صوت أمال ماهر.. الأغنية تحفة.
أدم.. في حدا
في أول الأغنية أدم بيقول: “في حدا بدنا يا ما عم نقدر ننساه.. لو شو ما عمل فينا، بقلبنا جوا إحساس أقوى منا .. عم يتحكم فينا”
والفيديو كليب جايب موديل مش طايقه نفسها، ورغم إن في كتير مننا عاشوا قصص حب من طرف واحد، وعادي جدًا إننا نحب حد والحد ده مايديناش وش، لكن اللي مش عادي إننا نكتب أغنية عنه ونقول “يلي بالحلوة حبّك وبالصعبة أتخلى عنك.. بكرا بيرجع لعندك.. وبيبطل أنت بدك”
حاجة توكسيك أوي بجد ومحتاجين نتعلم نـ move on ونعيش حياتنا ونسيب الناس تعيش حياتها كمان.
نانسي عجرم .. أنت إيه
في الأغنية دي نانسي بتقول: “أنا راضية إنك تجرحني وروحي فيك”.
وبتكمل بعدها: “لو كان ده حب يا ويلي منه، لو كان ده ذنب ما أتوب عنه، لو كان نصيبي أعيش في جراح.. هعيش في جراح.”
نانسي عندها تلات اختيارات في الأغنية دي، يا إما تحب وخلاص ويا ويلها، يا إما تتوب عن اللي بيحصل فيها ده وتعيش حياة صحية، أو الاختيار التالت واللي غالبًا نانسي هتختاره وهو إنها تعيش في جراح بقى وربنا يكون في عونها.
قولوا لنا رأيكم في الكلام ده وإيه أغاني تاني عربي توكسيك فاكرة نفسها أغاني رومانسية؟