أعلن الأمين العام للمجلس الأعلى للآثار، مصطفى وزيري، عن تفاصيل اكتشاف مدينة سكنية كاملة من العصر الروماني، خلال عمليات الحفر الأثرية في منطقة (بيت أندراوس)، الموجودة جنب معبد الأقصر في البر الشرقي، وتم الاكتشاف من خلال البعثة الأثرية المصرية.
قال وزيري، في مكالمة تليفونية مع الإعلامي المصري أحمد موسى، في برنامج (على مسؤوليتي) اللي بيتذاع على قناة (صدى البلد) إن تطوير وافتتاح المشاريع والمناطق السياحية والثقافية في مصر بيتم تقريبًا كل أسبوع، وده اللي يخلي مصر واحدة من أكتر دول العالم تميزًا في مجال السياحة.
وقال وزيري يوم التلات بالليل، إنه تم اكتشاف عدد من المباني السكنية وبرجين حمام من القرن التاني والتالت الميلادي، بالإضافة لبعض الورش لصناعة المعادن وصهرها، واكتشفوا كمان مجموعة من الأواني وقوارير مياه ومسارج فخارية وأدوات للطحن، غير عملات رومانية من النحاس والبرونز، وعدس وقمح وفول، والاكتشاف كان في البر الشرقي في محافظة الأقصر.
وقال وزيري إن الاكتشاف ده: “كشف النقاب عن أهم وأقدم مدينة سكنية بالبر الشرقي بمحافظة الأقصر، التي تُعَد امتدادًا لمدينة طيبة القديمة”، وأضاف إن: “البعثة سوف تستكمل أعمال الحفائر بالموقع التي ربما تقود إلى الكشف عن مزيد من أسرار هذه المدينة”.
وأكد وزيري، إن السياح حابين ازاي كان المصري القديم عايش، وده اللي بتوفر الاكتشافات الحديثة صورة واضحة عنه. وكشف وزيري، خلال المكالمة التليفونية مع برنامج (على مسؤوليتي) إن هيتم الكشف قريبًا عن تفاصيل بردية وزيري بطول 16 متر، واللي اكتشفتها البعثة المصرية، وقال إنه ماتمش اكتشاف بردية لبعثة مصرية من 100 سنة.
خلال السنين اللي فاتت تم اكتشاف كنوز أثرية كتير جدًا على طول مصر، وهي الاكتشافات اللي ضافت لمعرفتنا عن علم المصريات، ومنها الاكتشافات الكبيرة اللي حققتها البعثات المصرية في منطقة سقارة، في الجيزة.