خصم 60% هناك، وعرض ببلاش تقريبًا هنا، والواحد مش عارف يجيب إيه ولا إيه من أول الشهر، بس قبل ما تطلع الكريديت كارد وتتهور وتشتري، اسمع مننا النصايح دي عشان ميتنصبش عليك في الجمعة السوداء “البلاك فرايدي”.
الأمان الإلكتروني:
الشرا أونلاين ليه أصوله لازم تبقى عارفها، أول حاجة مش أي حساب على فيسبوك ولا انستجرام عامل إعلان نجري عليه، لازم قبل ما تشتري تبص على الحاجات دي، عشان ميتنصبش عليك في تخفيضات الجمعة السوداء..
- سعر المنتج في السوق قبل العروض كان إيه، عشان تعرف ده تخفيض حقيقي ولا اشتغالة.
- تشتري أونلاين يبقى من مكان معروف، مكان ليه محل وليه رقم تليفون وعنوان مكتوبين ومعروفين.
- لو هتدفع بكارت، أوعى تدخل بياناتك على أي موقع كده وخلاص، لازم يكون موقع تابع لشركة مشهورة وليها سجل تجاري.
- تقرا كويس أوي أوي أوي تفاصيل المنتج وتخلي بالك هو جديد ولا متحدث ولا مستعمل ولا هاي كوبي.
- خليك المفتش كرومبو ودور في التعليقات كتير وشوف تقييمات الناس للحاجة، ولو فرق السعر كبير أوي ننصحك تتراجع عشان ده فخ.
الاستغلال الأمثل للعروض:
رجع شريط حياتك وقلب في ذكرياتك، وشوف أعياد الميلاد اللي جاية عليك لحد فبراير كده، لو فيها ناس مهمين، اشتري من التخفيضات اللي يناسبهم، واخلص من الملف ده بدري بدري.
اللي بيجهزوا لجواز قريب مش محتاجين توصية، هما عاملين قايمة محترمة بكل اللي ناقص في البيت، بس بننصحهم يلفوا على الانفلونسرز شوية قبل ما يشتروا، عشان ياخدوا أكواد خصم مهمة.
نصايح عامة:
- اتأكد من سياسة الاستبدال والاسترجاع للمنتجات قبل ما تشتريها والفترة المسموح فيها ترجع حاجة.
- لو هتشتري هدوم، روح صفحة المقاسات الموجودة في الموقع واعرف مقاسك بالمازورة بيساوي كام في منتجات الموقع ده.
- المنتجات الطبية والصحية زيّ الأدوية والمكياج والعناية بالبشرة، يفضل تختار من مجموعة السنادي وبلاش تغامر وتشتري من جروبات مجهولة أو صفحات انترنت خاصة مش تابعة لشركة أو محل.
- اتأكد من علامة القفل اللي في البراوزر من فوق، اللي بتدل إن الاتصال آمن، لما تيجي تشتري باستخدام كارت البنك، وحاول تقلل الشرا الأونلاين من برا التطبيقات الموثقة والمشهورة زيّ نون وسوق وجوميا.
- حاول لما تشتري هدوم تكون من محل متعود عليه وجربته قبل كده، أو من تطبيقات موثوق فيها زيّ “شي إن” و”زارا” و”ماكس” و”اتش اند ام”.