السعودية كانت أعلنت من فترة إن هيتم إلغاء نظام الكفالة ومؤخرًا بدأ القرار يدخل حيز التنفيذ، طب كان إيه هو النظام القديم وإيه عيوبه وازاي إلغائه هيأثر بالإيجاب على الوافدين؟
النظام ده كان بيعتبر نظام قانوني كان معتمد في السعودية كلها وكان ساري على كل الوافدين من الرجالة والستات، كان بيسمح العامل الوافد “الشخص اللي عايز يشتغل هناك” بالدخول للمملكة بس شرط موافقة الكفيل بتاعه “صاحب العمل” وماينفعش برضه يخرج من البلد من غير ما الكفيل يوافق.
وماينفعش ينتقل من وظيفة لوظيفة تانية في نفس البلد أو يسيب الشغل عنده إلا بموافقته، وفي حالة رفضه هيضطر الموظف الوافد إنه يسيب البلد كلها بشكل إلزامي ويرجع لبلده، وبعدها يبدأ في إجراءات جديدة للكفيل الجديد من وهو في بلده.
وفي العادي، الإقامة بتبقى إلزامية وبتتجدد سنويًا مقابل مبلغ مالي بيدفعه الكفيل لمكتب العمل، بس بيبقى ملزم على الموظف إنه يدفعه بعد كده، ده غير إنه ممكن يجيب أهله وأسرته بس هيبقى على مسئولية العامل.
وبإلغاء نظام الكفالة.. إيه اللي هيحصل؟
الموضوع هيبقى له فوائد كتير خصوصًا إن أكتر من 2 ونص مليون مصري بيشتغلوا في السعودية، وبعد تطبيق قرار إلغائه، هيبقى في حرية للتنقل في الوظائف من غير قيود، ومن خلال منصة إلكترونية زيّ وزارة القوى العاملة في مصر يقدر إنه يغير الوظيفة، وبكده مش هيبقى من حق صاحب العمل إنه يرحل موظفه لو رفض إنه يمشي من المكان.
وبكده مش هيبقى في تاني حاجة اسمها بلاغات الهروب، مابقاش في الكلام ده وبقى في نظام مرتبط بكل حاجة تخص الموظف من مرتبات وغيره، والمرتبات هتزيد والعقد هيبقى إلكتروني ومش هيبقى مكتوب بالإيد، والموافقات كلها هتبقى عن طريق القنصليات العامة في الرياض، وده طبعًا هيبقى وفق قواعد وخطوات علشان الموظف مايقعش في مخالفات قانونية.. وده اللي وضحه نائب رئيس الاتحاد العام للمصريين في السعودية.
طب وإيه هي خطوات نقل العاملين؟
- هيبعت طلب النقل من صاحب العمل الجديد على منصة (قوى) الإلكترونية.
- مطلوب من الموظف إنه يوافق على الطلب. وبعدها بيتحول لفترة إشعار أو notice لمدة 90 يوم كحد أقصى، وخلال الفترة دي ملزوم من الموظف إنه يبقى مع صاحب العمل القديم لحد ما تنتهي المدة.
- وطلب النقل هيتم استكماله من صاحب العمل الجديد في أنظمة وزارة الداخلية.
إلغاء نظام الكفالة هيعود بمميزات ونفع على المصريين والوافدين في السعودية، وعلى حسب كلام وزارة الموارد البشرية في السعودية هيعود هو كمان بمميزات على المواطنين في الدولة وهيقلل كمان من معدل البطالة وهيجذبهم إنهم يشتغلوا في وظائف الدولة.