عدت سنة 2022 بحلوها وبمرها، وعايشين الأيام دي احتفالات وداع السنة اللي فاتت واستقبال السنة الجديدة، في لقاء صحفي مع الفيلسوف بيونج تشولهان، بيقول عن الطقوس الاحتفالية، زيّ اللي بنعيشها الأيام دي: “يمكن تعريف الطقوس على أنها تقنيات زمنية لتوطين الذات الإنسانية”.
وبيضيف تشولهان: “تعمل هذه الطقوس على تحويل الوجود الإنساني من الوجود في العالم (الغريب والمليء بالمجهول) إلى الوجود في البيت (الوطن أو السكن)”.
الطقوس الاحتفالية اللي بنستناها والفعاليات اللي بنتحمس لها، بتوفر لنا أُطر زمنية تسمح بتنظيم الوقت، فبدل ما نعيش الزمن كمفهوم سرمدي ولا نهائي وصعب الإدراك، بنقدر نعيشه كوحدات أصغر بيفصل ما بينها طقوس واحتفالات وفعاليات.
وفي انتظار السنة الجديدة، لقتني بفكر في الفعاليات اللي أنا مستنيها شخصيًا، ومتفائل أعيشها السنة الجاية علشان تدخلني في الجو الاحتفالي، اللي بيقول تشولهان إنه بيحول العالم والزمن لمكان دافئ يحسسنا بالأمان (السكن أو الوطن).
إيه فعاليات واحتفالات 2023 اللي هتحسسني بالدفء والتفاؤل؟
افتتاح المتحف المصري الكبير
واحد من أهم الأحداث اللي مستنيينها بقالنا وقت طويل جدًا، المتحف المصري الكبير هو أكبر متحف بيضم آثار حضارة واحدة في العالم، واتأجل افتتاحه لوقت طويل جدًا.
لكن اتفقت الدوائر العلمية والثقافية والإعلامية العالمية على إن أهم حدث خلال السنة الجاية 2023، هو افتتاح “المتحف المصرى الكبير”، واتوصف بإنه هيكون الحدث الأهم في تاريخ المتاحف والدوائر الثقافية والعلمية حول العالم.
ومن المتوقع إن احتفالية الافتتاح هيكون فيها مشاركين قد اللي شاركوا في مؤتمر المناخ (Cop27) في شرم الشيخ، ومن المتوقع كمان إن الاحتفال ده هيكون بحجم احتفالية موكب المومياوات الملكية، اللي العالم كله وقف يتفرج عليه بانبهار.
اكتشاف مقبرة كليوباترا
أُعلن السنة دي عن اكتشاف نفق واسع تحت الأرض قرب مدينة الإسكندرية، واللي ممكن يكون المدخل لقبر آخر فراعنة مصر، وأشهرهم على الإطلاق، الملكة كليوباترا السابعة.
النفق اللي طوله 1.3 كيلو متر، اتحفر في الصخر اللي تحت معبد (تابوسيريس ماجنا) ووصفته وزارة السياحة المصرية بإنه “معجزة هندسية”، وبتقول الباحثة الدومينيكانية من جامعة سان دومينغو، المسؤولة عن حفريات البعثة الأثرية الدومينيكانية المصرية، كاثلين مارتينيز، إن ده هو المكان المثالي لمقبرة كليوباترا.
انتهى تصريح الحفريات الخاص بالبعثة بعد اكتشاف النفق على طول، وبالتالي ماتمش استكشاف النفق اللي كان مغمور بالمياه، وهيتسكمل الباحثين الاستكشاف مع بداية موسم الحفريات اللي جاي في سنة 2023، ومتحمسين جدًا، ومتفائلين إنه يكون الموسم اللي هنكتشف فيه مقبرة كليوباترا السابعة.
حفلة كيفن هارت في القاهرة
واحد من الفعاليات اللي متحمس جدًا إني أعيشها السنة الجاية هي إقامة حفل الستاند أب الكوميدي الشهير “كيفن هارت” في مصر، لأول مرة بيزور هارت مصر من خلال عرض ستاند أب كوميدي يوم التلات 21 فبراير 2023.
هيكون الحفل في استاد القاهرة، وهيقدم فيه واحد من وصلاته الساخرة، اللي بتحلل القضايا العالمية والإنسانية المعاصرة في قوالب كوميدية، ويعتبر هارت واحد من أشهر رجال الكوميديا في العالم، بسبب خفة دمه وقدرته على تحويل أكتر القضايا الحساسة والمعقدة لنكت تضحكنا.
السخرية هي واحدة من أهم الأسلحة اللي نقدر من خلالها نشرح العالم، ونكشف عن حقيقته، ونحول التوتر والضغط لأدوات للمزاح، ونخفف من حدتها فنقدر نشوفها ونحكم عليها بشكل أفضل.
موسم الدراما الرمضاني 2023
بتقول الناقدة التلفزيونية رحمة حداد: “في ظل تراجع في كم وجودة الأفلام في مصر في الأعوام الأخيرة، وخاصة هذا العام، نتيجة الاحتكارات الجزئية للإنتاج والاعتبارات الرقابية اللا نهائية، تشهد صناعة المحتوى التلفزيوني أو بمعنى أدق المحتوى الذي تنتجه المنصات المدفوعة مثل شاهد التابعة للإم بي سي السعودية، ووتش ات المصرية، صحوة مثيرة للاهتمام، بأعمال قصيرة المدة ذات طبيعة مستكشفة للأنواع بشكل واضح”.
بتضيف حداد: “يمكن بسهولة تصنيفها في فئات واضحة: رعب، بوليسي، موسيقي، كوميدي، إثارة نفسية وهكذا، بعضها دامج لتلك الأنواع في وحدات غير مكتملة، لكن بها ما يدعو للمشاهدة، لكن الأساسي في تلك الموجة هو الابتعاد عن النوع الرئيسي للدراما المصرية وهو الميلودراما، تظل الأعمال المنتجة للتلفزيون خاصة في المواسم مثل رمضان تميل إلى الميلودراما أو الكوميديا العائلية، لكن مع بعض الاستثناءات التي تطرق موضوعات تاريخية أو خيالية أو تناقش قضايا معاصرة، مثل جزيرة غمام وبطلوع الروح، وهما أنجح وأكثر المسلسلات الرمضانية نيلًا للمديح هذا العام”.
وزيّ ما بتوضح حداد، الأعمال الدرامية شهدت موجة تجريبية مثيرة للأهتمام خلال سنة 2022، يبدو من الواضح إن القادم أفضل، وهنشوف أعمال درامية بتستفيد من تجارب سابقاتها، وعلشان كده متحمس جدًا للموسم الرمضاني القادم في سنة 2023، علشان أشوف هيطلع إيه من المنصات الجديدة الأكثر حرية في عدم تقيدها بالرقابة.
حصول مصر على كأس الأمم الإفريقية
دوري الأمم الإفريقية اللي بيقام كل سنتين، هيكون في ساحل العاج خلال سنة 2023، ومصر من الدول الأكثر حصولًا على الكأس بإجمالي سبع مرات في تاريخها، وتليها الكاميرون بمجموع خمس مرات، ثم غانا بمجموع 4 مرات.
ورغم إن الدورة اللي فاتت اللي أقيمت سنة 2021، فازت بيها السنغال، متحمسين جدًا للدوري السنة الجاية، ومتفائلين إن مصر تاخد الكاس للمرة التامنة.
والمصريين من أكتر الناس اللي بيتابعوا كورة القدم بكل حماس، وبالتالي دوري الأمم الأفريقية بيكون حدث ضخم ويعتبر احتفالية كبيرة في أوساط الجمهور المصري اللي بينتظرها وبيشجعها.
مع فوز السنغال في آخر دوري، خيم حزن كبير على الجمهور المصري اللي كان متوقع الفوز بسهولة، وبالتالي كانت النتيجة صادمة، ولكن بالنسبة للدوري القادم فمتوقعين إن المنتخب المصري هيتعلم من أخطاء المرة اللي فاتت ويقدر يتجنبها، ويحقق الفوز والفرح للشعب المصري.
آخر حاجة: لو في أحداث أو فعاليات متحمس لها في سنة 2023، قول لنا عليها فيا التعليقات.