بواسطة منة حسني.
بعد ظهور تصريحات قديمة عن التحرش للفنان أمير عيد المغني الرئيسي لفرقة كايروكي اثارت جدل على مواقع التواصل الاجتماعي، اعتذر الفنان عن ما ورد منه في رد على سؤال علي صفحة الأسك الخاصة بيه من 6 سنين، واللي فيها سأله واحد من المتابعين عن رأيه الشخصي في ظاهرة التحرش المنتشرة، وفي رده استخدم أمير تعبير “بنات شمال”، ولده انتقده ناس كتير.
وكان رد أمير على سؤاله هو: “الحل إننا نجيب نعمل عقوبة قانونية بالسجن 15 سنة للمتحرش ونجيب بنات شمال كتير ونشغلهم مع الشرطة ونسيبهم في الشارع واللي هيتحرش بيهم يتشد صوت وصورة.. ومع أول 50 واحد هياخدوا حكم باقي الشعب هيبص في الأرض.”
في ظل جائحة التحرش وانتشار إعترافات كتيرة الأيام الحالية، عدد من مواقع الأخبار أعاد نشر التصريح على إنه جديد، وإمبارح أعاد أمير عيد نشر السؤال وإجابته معتذرًا عن استخدامه المصطلح “بنات شمال” وكتب: “مواقع كتير منزله الخبر ده علي انه جديد وان دي وجهه نظري لحل مشكله التحرش في ظل الحراك الحالي تجاه المشكله.انا فعلا كتبت الكلام ده بس من ٦سنين علي اسك كما هو واضح وكنت متعود دايما اهزر مع الناس في ردودي بس ده ميمنعش اني ميصحش اكتب “بنات شمال” وبناء عليه ارجو قبول اعتذاري.”
كتير عاتبوا الفنان في التعليقات على التويت وطلبوا منه مراجعة لفكره عشان تصريحات زيّ دي جزء كبير من المشكلة.
لكن الغالبية العظمى من التعليقات كانت داعمة لأمير عيد وتنوعت بين ناس مش شايفة مشكلة في التصريح لناس متقبلة لإعتذار الفنان.
وكتير نددوا بتصرف جريدة الدستور اللي كانوا أول من ينشر التصريح بشكل مقطتع من سياقه، وكتير على تويتر اتهموا الجريدة بافتعال الجدل.
آخر كلمة: إيه رآيكم في الحصل؟ عرفونا في الكومنتس تحت.
