فصول السنة معروف إن لازم يبقى في حاجات بتميزها عن غيرها سواء في الأجواء أو طبيعة الأماكن اللي ممكن تروحها وتسافرها، والأهم من ده كله الأكل، وفصل الصيف معروف عنه أكلاته اللي مش بنشوفها أو مش بنحب ناكلها غير فيه، أكلات مكتوبة على اسم الصيف بتنعشنا وتطري على قلبنا وتهون علينا حر الصيف وفرهدته.
البطيخ والجبنة القديمة
أكلة تطري على قلبك في حر الصيف، وده مش من الفراغ لإن البطيخة الواحدة فيها ٩٠% مياه، ولو هنتكلم عن الشباب العربي فلازم ياكلوها وهما لابسين الزي الرسمي لأي بيت عربي في الصيف وهي الفانلة، وطبق البطيخ مع المش بالذات مقدس. تخيل إن في محل صغير موجود من 80 سنة كل شغلته إنه يقدم للناس طبق المش البلدي بالخلطة بتاعتهم مع البطيخ؟ طب أنت عارف كمان إن بلاد الشام بتعتبر الوجبة دي أساسية في السحور؟ بس ليه الخلطة دي بالذات مع بعضيها؟ ماعرفش الحقيقة بس المهم إنه بيحقق توزان في الطعم زيّ الجبنة مع العنب وزيّ البط بالبرتقال.
المكرونة والبانيه
المكرونة والبانيه الأكلة الرسمية للرحلات في المصايف واحنا صغيرين، ونجدة كل أم مصرية لما تتزنق في أكلة اليوم وماتلاقيش حاجة تعملها، كانت أكلة لذيذة وسريعة، بيقولوا عليها أكلة الناس الطيبين زيّ الشاي باللبن كده. في إتيكيت وفن مع الأكلة دي؛ ازاي تخلص طبق المكرونة مع أخر قطمة في حتة البانية، ودي عايزة حسابات واستعدادات قبلها.
المانجا
ودي معروف طقوسها من زمان وبتتاكل فين وازاي، ولو ماحدش قالك، أتفرج على حلقة ونيس وهو بياكُلها في البانيو. وأكيد أكيلة المانجا عارفين إن منها العويسي والفص والتيمور والصديقة والفونس والهندي والسكري، أول ما يهل الصيف والموسم بتاعها، بتطلع على الساحل وتشتري لك القفصين، وعلى مستوى المحلات مش بتعدي من تحت إيدهم الافتكاسات بتاعتها.
كتر من السمك والجمبري
الأسماك والجمبري وكل المأكولات البحرية شيء ملازمنا في أي صيف وأي مصيف، ماينفعش تبقى مسافر علشان تصيف ويفوتك أكلة سمك. ولما دورنا ورا موضوع ليه الناس بتاكل السمك في الصيف أكتر من الشتاء، لقينا إن في سبب بيفسره عم إسماعيل، واحد من تجار السمك في الإسماعلية، وبيقول إن السمك في الصيف بيبقى طعمه أحسن من السمك في الشتاء، وده لإن في الصيف بيتحرك وبيبلبط في المياه على عكس في الشتاء بيكرمش في نفسه وده بيفرق في الطعم، ده غير إن في أنواع كتير مش بتظهر غير في الصيف.
الفريسكا
فريسكا فريسكا أيوة جاي، كبار وصغيرين بيحبوها، طبقات من البسكوت محشية عسل ومكسرات، شيء أساسي بتشوفه على البحر في الصيف من كتر حب الناس فيها بقينا نعمل مسلسلات وأفلام باسمها. المدينة المشهورة بها هي إسكندرية، وبعدين راحت الساحل وبقى يتعمل منها افتكاسات. لو جينا دورنا ورا أصلها، هنلاقي إن في ناس رجحت إن أصلها عثماني وناس تانية بتقول إن أصلها إيطالي علشان الكلمة نفسها إيطالي.
التين الشوكي
ياجدعان عربيات التين دي خطر علي الاقتصاد بتاعي وربنا
Posted by Muhamed Ahmed on Saturday, July 23, 2022
وهنا بحدد وبتكلم عن التين الشوكي ومش البرشومي، عربيات بتظهر مع كل صيف وتقف تاخد لك بالطبق ولا اتنين ولا عشرة بعد ما البياع يقشرهولك، ومفيش مانع لو بلعت لك اتنين تلاتة خمس وحدات وأنت واقف على العربية والراجل بيعبي لك. التين الشوكي علمنا دروس إننا مانخدش بالمظاهر؛ برغم الشوك اللي برا بس هتدوق أحلى تين شوكي، بس السؤال المهم اللي لازم نسأله عربيات التين الشوكي نشاطها بيبقى إيه باقي السنة؟