معروف عن فصل الشتا إنه مختلف عن أي فصل تاني. له تفاصيله اللي بتميزه عن أي فصل تاني، زيّ الأكل اللي مش بنحب نقرب له غير لما الشتا ييجي زيّ العدس. والحاجات السخنة اللي بنعتبرها الراعي الرسمي للشتا منهم السحلب وحمص الشام، وزيّ ما في أكل مش بيظهر غير في الشتا. وفي أغاني برضه مرتبطة بمود الشتا، بتتكلم عن الشتا أو عن قصص بطلها الأساسي هو الشتا وبنحب نسمعها في الوقت ده بالتحديد.
فيروز – أديش كان في ناس
صوت فيروز بيفكرنا بشجر الأرز ولبنان، ومن أكتر الأصوات المرتبطة معانا بفصل الشتا. شتا يعني تسمع فيروز. ممكن بسبب الدفا اللي في صوتها أو الأغاني الكتيرة اللي كانت مرتبطة بالفصل ده. ماحدش عارف إيه السبب بس الأكيد إننا بنحب نسمعها في الشتا!
فيروز- تلج تلج
فيروز- حبيتك بالصيف حبيتك بالشتا
من تاني فيروز بتقدم لنا أغاني مرتبطة بالشتا، وبتدينا إحساس الاكتئاب الشتوي.
دنيا سمير غانم- قصة شتا
من أنجح الأغاني اللي عملتها دنيا سمير غانم، كلمات أمير طعيمة وهشام جمال. الكلمات والصوت قدروا يوصلوا الإحساس بتاع الأغنية.
علي الحجار- الشتا يدق البيبان
لما الشتا يدق البيبان، لما تناديني الذكريات
لما المطر يغسل شوارعنا القديمة والحارات
علي الحجار من الأصوات المهمة والقوية في تاريخ الغنا في مصر، ولما غنى بكلمات الشاعر إبراهيم عبد الفتاح عرف يوصل حالة الشتا اللي بيعيشها الناس في إسكندرية واللي معروفة بجوها الشديد في الشتا اللي ناس بتشوفه روعة وناس بتشوفه قاسي..
فيروز- رجعت الشتوية
أيس كريم في جليم- عمرو دياب
لما كنا بنسمعها واحنا صغيرين، ماكناش بنفهم ازاي “أيس كريم في ديسمبر”! ازاي ناكل أيس كريم في برد الشتا! ولكن بنعتبرها من الأغاني المتفائلة اللي بتتكلم عن أجواء فصل الشتا. وده عكس الأجواء اللي بتبقى موجودة في معظم أغاني الفصل ده واللي دايمًا بيغلب عليها طابع الحزن أو الكآبة.