في مسلسلات رمضان، بيحب صناع العمل أحيانًا يضيفوا أغاني تعبر عن الأحداث اللي دايرة وتحكيلك الحدوتة باختصار وتضفي جو مختلف على الحلقة. وعلى مدار شهر رمضان، سمعنا أغاني عجبتنا من مغنيين بنحبهم وخدمت أحداث المسلسل.
كايروكي – سألت نفسي
“ولا الزمان والمكان سامحين .. ما فيش وقت للمحبة والحنين.. وفاقد الشيء أكيد لا يعطيه” ظهور مميز لأغنية أمير عيد ضمن أحداث الحلقة الأولى لمسلسل تغيير جو بطولة منة شلبي.
أغنية بتبين حجم التخبط والوحدة اللي عايشاها شريفة، بعد انفصال أهلها ودخول والدتها مصحة لعلاج الإدمان على المهدئات.
سمر طارق والوايلي – لو
“لو كان الحيط سامع هم الموجوع، لو كان الخيط بالساهل لو مقطوع” اتعرضت في مسلسل الهرشة السابعة وبالتحديد في الحلقة التاسعة.
فضلت الأغنية تريند لمدة تلات أيام على منصات التواصل الاجتماعي، واشتغلت في مشهد الاعتراف وانفصال الزوجين والمشهد كان في قمة الحبكة الدرامية.
أحمد سعد – أنا قادر
غناها أحمد سعد لمسلسل جعفر العمدة، نزلت كأغنية دعائية في الأول واستخدموها خلال أحداث المسلسل، المميز في الأغنية هو الأداء الصوتي لهشام الجخ في البداية قبل ما يبدأ أحمد سعد.
بيقول فيها: “سوق الندالة وسع والكل بقى بيلت.. العزوة هي الميزان فيها الرجال بتبان ولما الراجل يقلع توبه يبقى مالوش أمان”.
مين فينا يتلام – أحمد سعد
“على الحال ده أنا عايزك تجاوبني مين فينا يتلام.. كان نفسي تبقى ضهر ساندني في وش الأيام.. ياخي قطع الإيد اللي اتمدت في يوم عليك” في مشهد ضرب جعفر العمدة لأخوه الكبير سيد بالقلم علشان يرد له القلم اللي ضربه لواحدة من زوجات جعفر.
مشهد الناس اتكلمت عنه وماكانوش عارفين يقفوا مع مين ضد مين، خصوصًا بعد ما ظهر قلة الحيلة على محمد رمضان وهو بيقول له: “طول عمري بكبرك وأنت مُصر تصغرني”.
بيكيا – دنيا وائل والوايلي
ظهرت في البرومو الدعائي لمسلسل الهرشة السابعة، وظهرت ضمن أحداث الحلقة الأولى، لكن دي ماكانتش المرة الأولى اللي نسمع فيها الأغنية، اللي قرر المخرج إنه يضيفها لأحداث المسلسل بالاتفاق مع صناع الأغنية علشان يبين للجمهور التنوع الثقافي والفني اللي عندنا، وفي نفس الوقت بعد ما الأغنية اتعرضت رجعت الناس تاني تدور عليها وحبتها أكتر.
قل لنا إيه أكتر أغنية علقت معاك في رمضان السنة دي؟