كرامن أرجيه هو طقس من طقوس النوبة، أرض الذهب الممتدة على طول نهر النيل اللي أهلها لسة متمسكين بتقاليدهم، وحريصين دايمًا على توارثها جيل بعد جيل. كرامن أرجيه بيتم تحضيره في كل البيوت النوبية، وهو بيشبه طقس “السبع حبات” المعروف عند معظم المصريين عند الاحتفال بالمولود الجديد في السبوع.
الطقس ده بيحصل كل خسوف قمر، وهو الظاهرة الفلكية اللي بتحجب فيها الأرض نور الشمس عن القمر، وسيدات النوبة الكبار في السن بيتجمعوا سوا، ويبدأوا في تحضير طقس كرامن أرجيه، اللي بتشمل سبع أنواع من الحبوب زي القمح، والفول، والبسلة، والذرة، واللوبيا، وبيطبخوها في حلة كبيرة.
والطقس ده ليه شروط معينة، فلازم يتعمل في مكان مفتوح زي الشارع، لأنهم بيعتقدوا إن البخار الناتج عن عملية الطبخ بيبعد الشر، وبيمنع البلاء الموجود في البيوت، والشوارع، والأماكن عامة. فماينفعش يتعمل في مكان مقفول، وكمان لازم يكون أول من يدوق الكرامن أرجيه من الأطفال، كنوع من المباركات، وبعد كدة الستات بياخدوا عينات من الحلة، وبيدلقوها قدام البيوت، وفي الشوارع، مع تكرار الأدعية بصوت واضح لفك الكرب، وتخفيف المصائب، والمصاعب، ورفع البلاء.