لأن السعادة لها مليون شكل،خصوصًا لما ييجي من جملة حاضرة في دماغنا من زمان، زي أشهر إيفيهات عاشت في السينما أو على خشبة المسرح، حبينا نشارككم جرعة ضحك من اللي قلبك يحبه.
من نكتة اتقالت واتحفظت وبقت جزء من تراثنا الكوميدي، تعالوا ننشط الذاكرة ونسترجع مع بعض أشهر الإفيهات اللي ضحكت أجيال مننا على شاشة السينما وفي قلب ضحكات الجمهور على المسرح، ولسه بتضحكنا لحد النهارده!
لا تفوّت قراءة: من “إلغي رحلتي” لـ”صديق Chat GPT”.. شخصيات جيل Z هتقابلها في الشغل
مش يمكن لما أجرب أطلع بعرف؟ .. لا تراجع ولا استسلام
جملة خالدة بنستخدمها في حياتنا اليومية لما نتزنق في أي سؤال عن حاجة بنعرف نعملها ولا لأ.
الإيفيه ده اتولد من (حزلقوم) في فيلم لا تراجع ولا استسلام على الضابط سراج ماجد الكدواني: “أنت بتعرف تسوق؟”؛ علشان يرد عليه حزلقوم أحمد مكي بمنهى البراءة “مجربتش!”.
ويرد عليه سراج بعصبية : “هو إيه اللي مجربتش؟! ما هو يا بتعرف يا مبتعرفش”، علشان يرد حزلقوم بجملته الشهيرة: “مش يمكن لما أجرب أطلع بعرف” .. عندك حق والله يا حزلقوم هما كلهم اتولدوا علماء يعني!
لا تفوّت قراءة: كيف تفهم لغة جيل الـ Gen Z؟ دليلك الذكي والمبسط للمصطلحات العامية
أراك توزع من مال أمك!.. يا أنا يا خالتي
جملة بسيطة قالها الفنان الكوميدي محمد هنيدي في فيلم “يا أنا ياخالتي” وهو متقمص شخصية الثري العربي اللي بيوزع فلوسه يمين وشمال.
بس لما يشوف المساعد بتاعه (علاء مرسي) هو اللي بيطلع الفلوس وقرر إنه يدي واحد غلبان الفلوس كلها من غير ما يستشيره طلع إيفيه قاله “أراك توزع من مال أمك”.
لا تفوّت قراءة: قبل صدور ألبوم “ابتدينا”.. أشهر 7 أغاني صنعت أسطورة الهضبة عمرو دياب
متآمنش لحد غير أمك يا علي، ولو أبوك طلقها ماتأمنلهاش! .. صعيدي في الجامعة الأمريكية
إيفيه تلقائي من فيلم “صعيدي في الجامعة الأمريكية”، “أنا قولتلك حريم لأ حريم لأ، متآمنش لحرمة في الدنيا دي غير أمك، ولو أبوك طلقها متآمنلهاش”.
وبصراحة بقينا نستخدمه مش على نوع بشري واحد لكن متآمنش في العموم.
لا تفوّت قراءة: من “شيرين” لـ”الشامي” … أشهر دويتوهات فنية في مسيرة نجم الجيل تامر حسني
بلاها نادية خد سوسو.. سك على بناتك
فؤاد المهندس كان طالع في مسرحية “سك على بناتك” بدور راجل كل همه أنه يجوز بناته علشان يشوف حياته هو ويتجوز من صاحبة الصون والعفاف عصمت.. يعمل إيه بقى؟
دخل في مزاد مع معيد قسم الحشرات وبدأ يقترح له واحدة من بناته وبعدين ينقل على مواصفات اللي بعدها، علشان يطلع في النهاية الحوار بالشكل ده.
– بقول ايه بلاش نادية خد سوسو يا ابني اسمعني بس خد سوسو وأنا ضامنهالك المرة دي هديك سوسو وهديك معاها ضمان لمدة سنتين أظن مافيش بعد كدة .
= خلاص نتكلم في دة بكرة
– ليه يابني خد سوسو
“بقلك ايه خد فوزية”
– يا عم اجري يا عم
= طيب رأي سعادتك النهائي ايه ؟
– بلاها نادية وخد سوسو
= طب أنا عندي رأي بلاها نادية بلاها سوسو . مهو سعادتك انا لو خدت بنتك بضمان سنتين ألاقي منين قطع غيار ؟
“مش هو ده المنطق يا متعلمة يا بتاعة المدارس؟” .. مدرسة المشاغبين
مسرحية مدرسة المشاغبين كانت عبارة عن قاموس إيفيهات متحرك، كل مشهد أو تفصيلة أو تعبير كان بيقول حاجة فيه.
وفي مشهد بيجمع بين الفنان الراحل سعيد صالح والفنانة سهير البابلي، كانت بتسأل بكل براءة سؤال في صميم المنهج وفاكرة أن مرسي ابن المعلم الزناتي هيجاوب بكل بساطة برضه في صميم المنهج.
بس اللي ماكنتش تعرفه أنه هيجاوب في صميم حياته هو “تعرف إيه عن المنطق يا مرسي؟” .. يرد ببساطة ” أنا أعرف أن لما حد يقع مايحطش منطق. مش هو ده المنطق يا متعلة يا بتاعة المدارس؟”
لا تفوّت قراءة: حفلات أول أسبوع من يوليو 2025 في الساحل الشمالي.. جدول الفعاليات الغنائية والتذاكر والمواقع
شغلتك على المدفع بررم؟ .. إسماعيل ياسين في الأسطول
فاكر اليوم ده اللي كنا دايمًا بنتجمع فيه بعد صلاة الجمعة على طول؟ كل العيلة قاعدة قدام التليفزيون الصغير ومستنيين بفارغ الصبر عملاق الضحك إسماعيل يس من فيلم إسماعيل يس في الأسطول.
ويبدأ معاه سلسلة من المواقف والإيفيهات من صانع الكومديا وكان أشهرهم على سطح المركب بين العسكري رجب وبين الشاويش عطية.
عطية بدأ يدي أوامر عسكرية: ‘مخالي شِل’، ورجب وقف مش فاهم يعني إيه ‘مخالي’، وافتكرها اسم واحد، وقال: ‘يا جماعة اللي اسمه مخالي يرد.. أصل ده راجل شراني وأنا عارفه’.
بس الكوميديا كانت لما عطية طلب من كل جندي يقول رقمه والمهمة اللي مكلف بيها على المدفع، وقال: ‘طقم مدفع.. عِد’. رجب اتفاجئ إنه لازم يرد بسرعة، بس الكلام اتلخبط في بقه وقال: ‘بروروم’.
عطية ما سابهوش وسأله : ‘بروروم؟! شغلتك على المدفع بروروم؟!'” .. وبقت “برورمم هي الجملة الخالدة لما منعرفش نقول حاجة في أي حاجة”
لا تفوّت قراءة: الثوب الفلسطيني: حكاية وطن تُطرز بالخيط وتُنقش في الذاكرة
نخلي الـ 8 دي 5 والـ6 دي نخليها 5 برضو أنا بحب الخمسة .. سمير وشهير وبهير
فيلم سمير وشهير وبهير قدر إنه يدخل في سكة إيفيهات جديدة على السينما المصرية في الوقت ده.
وكلها كانت من منطلق أنهم راحوا زمن مش زمنهم وبدأوا يخبطوا في كل حاجة حوليهم.
وفي مشهد لبهير لما يقابل الشاويش وياخده تحري، بكل بسذاجة هيطلع له الباسبور ويقولوا الشاويش “أنت ضارب لي باسبور بتاريخ ميلاد لسه ماجاش؟
بهير يسكت ؟ لأ هيفكر بمنتهى البساطة والعبثية ويبدأ يغير في تواريخ الميلاد قدام الشاويش ويكتر من الخمسة علشان بيحب الخمسة!
دي صفحة الملوخية؟ دي صفحة الوفيات يا لينا! .. المتزوجون
وفي اليوم العالمي للسعادة مش هننسى لينا ومسعود عرسان جداد، ولينا نفسها تبان إنها ست شاطرة قدام جوزها وتعمل له فرخة، هتستعين بمين ياترى؟
بكتاب أبلة نظرة منقذ الفتيات عبر العصور، بس الظاهر إن لينا هتفتح صحفة غلط وتجيب بدل الدقيق اسمنت من تحت الحوض.
علشان يتحول الموضوع من صفحة الطبيخ قسم الفراخ لصفحة الوفيات.
ده كتاب ابلة نظيرة؟
= هو ده
– صفحة الملوخية؟!
= صفحة الملوخية
– مش ممكن . .دى صفحة الوفيات يا لينا
لا تفوّت قراءة: أسرار الجمال الخالد.. فنانات الزمن الجميل يكشفن وصفاتهن السحرية
إنها الفتنة يا أخ محمود .. مرجان أحمد مرجان
رجل أعمال يقرر إنه يكمل تعليمه في جامعات أولاده، والمواقف الكوميدية والضحك كله هيجيي من هنا.
اختلاف الأجيال والثقافات طلعت مادة غنية للفيلم، ولأنه مش هيفصل بين كونه طالب جامعي وأب بيشوف أولاده في الجامعة كل الأمور هتدخل على بعض.
ولما يشوف بنته بتظهر مع زميلها مش هيسكت وهيدخل على الخط الداعية بتاع الجامعة وكل واحد هيجود من عنده في المشهد ويدخله الموضوع في كفر وإلحاد ودين جديد!
الشغلانة دي مش محتاجة شهادة دي محتاجة ليونة.. العيال كبرت
وطبعًا واحنا بنحتفل باليوم العالمي للسعادة مش هننسى سحر بنت رمضان السكري في العيال كبرت.
هتقرر إنها تشتغل رقاصة وطبعًا علشان أخوها مرسي عشلان يمهد الموضوع لأبوها يعمل إيه؟
هيدخل الدخلة المحترمة ويقوله بنتك ربنا كرمها وهتشتغل .. تشتغل ازاي من غير شهادات؟ علشان يرد مرسي (سعيد صالح) ويقول له دي مش محتاجة شهادة دي محتاجة ليونة!
