أساسيات الاحتفال: مشاهد وعلامات بتقولنا “أهلًا أهلًا بالعيد”

زي ما فيه روائح وعلامات وروحانيات بنحس بيها لما ييجي رمضان وأهو جيه يا ولاد هيصوا يا ولاد، العيد برضه له علامات بتبدأ قبله كإنها بتستقبله من وهو على الباب، لأنه مينفعش يعدي في سلام وهدوء لازم نودع رمضان بـ”والله لسه بدري واله يا شهر الصيام” وننزل بأغنية “أهلًا بالعيد ومرحب بالعيد.. سعدنا بيها بيخليها ذكرى جميلة لبعد العيد” بس ازاي بيهل علينا؟

تنفيضة العيد

دي من أوائل الروائح اللي بتهل علينا، لأنها بتبدأ من قبلها بفترة، يوم للسجاجيد ويوم للستاير ويوم للمفارش ويوم للأرض، وكل ده مش بيعدي بالساهل لأنه بيبقى تحت إشراف هيئة التنظيف اللي بتخليك تلمع وتمسح تحت أماكن عمرك ما تخيلت أنها موجودة في البيت أساسًا، والأمر ممكن يتطور لإننا نمسح تحت السراميك علشان الضيوف اللي مش بييجوا مايقلوش حاجة لما يشوفوا معدل 3 سم من التراب.

مشوار الحلاق والكوافير

ودي مهمة مشتركة ولازم تبقى بعد تنفيضة العيد، في من البنات اللي بتروح وبتقف بالطوابير ولا كإنها هتقدم على فيزا وفي اللي بيلجأ للطبيعة من ماسكات، أما الولاد بيبقى في مشوار للحلاق وبيطلعوا بعده بقصات مختلفة زي قصة عرف الديك.

ريحة الكحك

الأفران بتبدأ تطلع الصاجات والأهالي يبدأوا في تحضير مستلزمات الكحك من سمنة وأجهزة تقطيع إلى آخره وبيقعدوا في مشهد عائلي دافئ جميل مع الأطفال وهما بيعملوا الكحك، يمكن المشاهد دي اتغيرت أو قلت بشكل كبير بس لسه في عائلات بتحرص أنها تعيش أولادها في الحالة، وحتى لو معشتهاش في البيت يكفي أنك تعدي من جنب أي فرن وتشم الروائح وهما بيتخبزوا.

مشهد انتظار الرؤية

وده بيبقى أهم مشهد ومن غيره كل المشاوير اللي روحناها والطوابير اللي وقفناها مالهاش أي لزمة، الناس في البيوت والشوارع وعلى القهاوي بتستنى الرؤية اللي بتحدد إذا كان العيد بكرا ولا نستنى شوية، ودي بتبقى لحظات لا تقل أهمية عن لحظات ضربات الجزاء في نهائي أفريقيا ولا تصفيات كأس العالم، لإنه على أساسها كمان بنختار هنشغل أغنية “والله لسه بدري يا شهر الصيام” ولا عادي زي ما احنا.

الزحمة الكتير

ودي بتبقى مختلفة عن زحمة رمضان اللي متعودين عليها، لأن في رمضان فئات معينة اللي بيحبوا يقضوا رمضان نايتس (ليالي رمضان)، أما في العيد كله بيخرج علشان يشتري هدوم العيد أو البيجامة أو يقعدوا على القهوة أو يخرجوا أخر خروجة حلوة وسط الأجواء الرمضانية وقبل ما يشيلوا الزينة والفوانيس.

مشاوير التسالي

بجملة المشاوير اللي بتتعمل بعد ما بنعرف أن بكره العيد، مشاوير البقالة بنروح نشتري كل التسالي اللي عند محلات المحمصات والمقرمشات، وبننتقل من مرحلة بل البلح والخوشاف وقمر الدين والكنافة لمرحلة اللب والسوداني بكل أنواعهم والبنبوني والملبس والكاجو وحفلة المكسرات، وده لزوم قعدة الكنبة والفرجة على المسرحيات وبينضموا لقائمة الترمس.

آخر كلمة: ماتفوتوش قراءة: بروحانيات رمضان: 10 مساجد تاريخية مفتوحة للصلاة في القاهرة