“ده حق البلد”.. رئيس هيئة قناة السويس يتوقع تعدي الخسائر المليار دولار، ويطالب بحق مصر في تعويض
يوم التلات -23 مارس-، العالم صحي على شلل في حركة التجارة العالمية بعد جنوح سفينة “إيفر جيفن” العملاقة في قناة السويس المصرية، الشئ اللي أعاق حركة الملاحة الدولية واستمر لمدة 7 أيام، في كارثة دولية نادرة من نوعها.
لمدة أسبوع، اتعرضت مصر لخسائر في الإيرادات والرسوم وصلت ما بين 12-14 مليون دولار في اليوم، ده غير خسائر فادحة وصلت للمليارات أثرت على اقتصاد العالم وده نتج عن تغيير حركة الملاحة بشكل مؤقت للممر الأصعب، طريق رأس الرجاء الصالح. لكن بعد مجهودات بشرية جبارة في خلال الـ 7 أيام دول، أخيرًا اتحررت السفينة البنمية من ضفتي القناة والفضل كان يرجع للأيادي المصرية اللي ماشفتش راحة طول فترة الأزمة.
دلوقتي وبعد انفراج الكرب، تم حجز السفينة في مرفأ مصري، و يوم الأربعاء طالبت السلطات المصرية القبطان بتسليم الصندوق الأسود وعدد من المستندات في السفينة لإجراء تحقيق شامل يكشف سبب الجنوح عشان يتم تحديد إذا كان ناتج عن خطأ تقني ولا بشري. لحد لحظة كتابة المقالة دي، قبطان السفينة لسه ملباش طلبات مصر.
وأعلن الفريق أسامة ربيع رئيس هيئة قناة السويس بإن السفينة هتفضل محجوزة لحد ظهور نتائج التحقيق والاتفاق على تسوية مرضية. وفي مقابلة الأربعاء، مع قناة صدى البلد التلفزيونية المصرية قال “حجم التلفيات والخسائر، والكراكات استهلكت كام وكل حاجة هتتحسب، التقديرات إن شاء الله هتوصل لمليار دولار وشوية، ده حق البلد”.
تقارير انتشرت على الإنترنت وضحت إن الشركة كان ليها حادثتين تانيين في القناة ولكن تفاصيلهم مش معروفة.
حاليًا السفينة البنمية عليها بضاعة تقدر قيمتها بـ 3.2 مليار دولار في طريقها لروتردام في هولندا، وأعلنت الشركة التايوانية المسئولة عن البضاعة بإنها غير مسئولة عن التأخير في توصيل حمولتها.
بعد نجاح العمال والمهندسين المصريين في إزاحة كمية رمل مهولة تقدر تملى أكتر من 12 حمام سباحة أوليمبي، أكتر من 400 سفينة متعطلة قدروا يخرجوا من القناة، ورجعت حركت الملاحة الدولية لمجراها الطبيعي.
قناة السويس بتعد أهم ممر ملاحي في العالم كله ولوحده متكفل بـ 10% من حركة التجارة العالمية، وبناءً على ده، وضح الفريق أسامة ربيع إن مصر هتعمل على إن مشكلة زيّ ديّ متتكررش تاني، خصوصًا إن حاليًا في حركة تجديد في القناة عشان ترفع كفاءة العبور في اليوم من 50 سفينة لـ 95.