فاكرين رمضان اللي فات؟ كام مرة كنا بنسمع عن نجم إنه اختفى من موسم رمضان بسبب إنه طلب أجر مبالغ فيه، فموافقش المنتجين لإنتاج المسلسل ليه؟ تقريبًا كل سنة بنسمع إشاعات زيّ دي، بس نادرًا ما بنتأكد منها.. بس مفيش دخان من غير نار، مش كده؟ والمشكلة كمان، إن بعد الإشاعات اللي بتطلع بيبدأ يحصل جدل من نوع آخر.. ففي اللي بيقول إن الأجور اللي بتطلب دي غير منطقية وقد إيه الناس دول عايشين في عالم غير بتاعنا وبنبدأ ندخل في قضية “في ناس مش لاقية تأكل وانتوا بتاخدوا ملايين”.. وفي اللي بيشوف إن من حق كل شخص إنه يطلب ماديًا اللي هو شايف إنه يستحقه لإنه بيعمل مجهود يستحق ده، زيّ ما من حق الطرف الأخر يقبل أو يرفض.
ورجعنا تاني للإشاعات اللي من النوع ده، لما برنامج “معكم” اللي بتقدمه منى الشاذلي نزل برومو إن في حلقة هيستضيفوا فيها بيج رامي بطل كمال الأجسام المصري اللي كسب بطولة مستر أوليمبيا 2020 العالمية في أمريكا، وده يُعتبر إنجاز كبير جدًا، بيدخل بيه التاريخ لإنه أول مصري يفوز بالبطولة دي.. وبعد فترة انتشر أخبار إن إدارة البرنامج قالت إن الحلقة دي مش هتتم لإن بيج رامي طلب نص مليون جنيه مقابل الحلقة، وهو مبلغ مبالغ فيه بالنسبة ليهم، فبدأ الجدل من تاني..
فقامت ثورة على منى الشاذلي وبرنامجها ووضحوا قد إيه بيج رامي تعب لحد ما يوصل للمكانة دي وإن من حقه يطلب اللي هو شايفه مناسب، ولكن التشهير بيه ويتقال إنه طلب مبلغ كبير ده كان آخر حاجة المفروض إنها تحصل. وبدأنا نشوف بوستات هجومية على البرنامج والإعلامية منى الشاذلي بسبب الإشاعات اللي انتشرت عن سبب عدم حضور بيج رامي للبرنامج بسبب الفلوس.. وتدخل كمان ناس من الوسط الفني في الموضوع زيّ الشاعر الغنائي أمير طعيمة اللي كتب تويتة علق فيها عن الأمر ودافع عن حق بيج رامي في طلب المبلغ اللي هو عايزه.
وبعد كل الجدل ده، صرحت إدارة برنامج معكم منى الشاذلي من خلال بيان نزل إمبارح قالوا فيه إن كل الأخبار دي كاذبة وإنهم بيحترموا البطل بيج رامي وأي ضيف بيجلهم أو هيجيلهم، وإن هما مش بيسعوا للشهرة على حساب ضيوفهم والمنفعة منهم.