في فيديو انتشر على السوشيال ميديا، كايري بيرك، رئيسة المحتوى الترفيهي لشركة ديزني، أعلنت عن أجندة جديدة هتنفذها الشركة في إنتاج أفلامها في الفترة الجاية، وإنها هتدعم المثلية الجنسية وتبرز ده في أعمالها، وحسب كلام بيرك، هي شايفة إن محتوى ديزني مش بيتكلم كتير عن الموضوع ده وإن مافيش شخصيات مثلية كتير في ديزني، وهي عايزة تظهر ده أكتر في الأعمال الفنية لديزني.. لإن كاتي بيرك حسب كلامها، هي أم لطفلين، واحد فيهم متحول جنسيًا والتاني مثلي.
بعد إعلان الخطة دي أو الأجندة الجديدة دي، اللي هيتم تنفيذها في أكبر عدد من أفلام ديزني، وبدايتها كانت بفيلم “Lightyear” اللي شوفنا عليه جدل كبير.. رد فعل الشرق الأوسط كان منع عرض الفيلم في حوالي 14 دولة، والسبب إن الفيلم بيحتوي على مشهد فيه قبلة بين شخصين مثليين، وديزني رفضت حذف المشهد؛ فبالتالي الدول دي صممت على منع عرض الفيلم كله بسبب المشهد ده.
رد الفعل ده ماتوقفش على الشرق الأوسط بس، الغرب كمان في ناس أعلنت عن رفضها للأجندة الجديدة دي، زيّ ما شوفنا في تعليق الإعلامية، ميجان كيلي، في برنامجها على فيديو كايري بيرك.
شوفنا الجدل ده وقت عرض فيلم “Doctor Strange” اللي برضه اتمنع من العرض في دول كتير في الشرق الأوسط بسبب مشاهد عن المثلية الجنسية، ورفض ديزني لحذف المشاهد واتكرر نفس السيناريو بمنع عرض الفيلم كله في البلاد دي.
