مافيش حد فينا ماسمعش في مرة جملة زي دي، سواء بتتقال له أو لحد حواليه، وبنشوف الناس بتحكم على بعض عن طريق الأبراج، وفي ناس كمان بيقرروا مايتعاملوش مع أشخاص من مواليد برج معين، زيّ ما سمعنا في مرة حد قال “أنا مابحبش أتعامل خالص مع أي حد من برج العقرب” وحبسه في صندوق على حسب برجه، وإنه كده خلاص صفات البرج ده -زيّ ما بتتقال- وصمة عار هتخلي الناس تحكم عليك من خلالها.. طيب هي الأبراج فعلًا بتتحكم في صفات الشخصية للدرجة دي؟
بنتخلص من تابوهات ولا بنصنع تابوهات جديدة
سواء كنت مؤمن بعلم الفلك والأبراج، وإن كل برج مواليده بيكون لهم صفات معينة مشتركة، أو كنت مش مصدق كل ده، هل في حاجة مستاهلة إننا نحط بعض في قوالب ونحكم على بعض من خلالها؟ مش كفاية كمية القوالب والصناديق اللي كلنا حابسين بعض فيها أصلًا؟ ده احنا لسه بنشم نفسنا من العنصرية والتفرقة والتمييز اللي بيكونوا على أسس مختلفة، وبندعم ونشجع كل محاولات إن الناس تتقبل بعضها، لكن لسه قافشين في الحتة الصغيرة دي، والناس بتحكم على بعض فيها.
حتى لو دي حاجة علمية على عيننا وراسنا، بس أكيد مش كل البني آدمين في العالم كله اللي القدر خلاهم يتولدوا في نفس اليوم أو في نفس الشهر، كلهم يبقى فيهم نفس الصفات الحلوة والوحشة، ومش طبيعي إننا نحكم على أساسها، ومش علشان حد مواليد برج معين شوفنا منه مواقف مش قد كده، نحكم على باقي البشر اللي من مواليد نفس البرج إنهم زيّه.
تجربة شخصية
وبشكل شخصي بقى، ليه دايمًا في عداوة تجاه مواليد برج الجوزاء؟ الناس بتحكم علينا إننا بشخصيتين أو مجانين أو مزاجهم متقلب دايمًا، مش لازم يعني كل الناس اللي اتولدوا في الشهر ده يكون عندهم انفصام في الشخصية زيّ ما الناس بتقول، حتى لو أنا شخصيًا عندي تقلبات مزاجية مثلًا، هل كل مواليد البرج ده عندهم نفس الصفة أو ينفع نعممها على كمية البشر دول كلهم؟
ولا كل مواليد برج العقرب فعلًا عقارب يعني ومش سالكين؟ علشان واخدين السمعة دي وخلاص مش عارفين يخرجوا من القالب اللي اتحطوا فيه ده. إنك قابلت شخص مش سالك ولقيته مولود في الوقت ده من السنة وبرجه العقرب، ده مش معناه إن كل الناس اللي اتولدوا في الوقت ده مش سالكين، المشكلة في التعميم.
وطبعًا صفحات الفيسبوك مابتفوتش الفرص دي..
تحديد حياتنا على أساس البرج
فاكرين حلقة من حلقات مسلسل حكايات زوج معاصر، كانت بتتكلم عن إن البطلة مهووسة بالأبراج، وبحثت ودققت في تاريخ ميلاد وبرج جوزها قبل ما تتجوز وقررت على الأساس ده إنهم متوافقين -من وجهة نظرها- وشالت من حساباتها إنهم متوافقين علشان شخصياتهم متوافقة، مش علشان صفات برجها وصفات برجه متوافقين، لكن لما عرفت إن في شك في تاريخ ميلادها حسب حكاية كده حصلت لناس كتير، وهي إنهم يتولدوا في يوم ويتسجلوا في يوم تاني، حياتها اتدمرت وشافت إن هي وجوزها ماينفعش يكملوا مع بعض علشان برجها -اللي اكتشفته مؤخرًا- مش متوافق مع برجه.
دي مش مجرد حلقة مسلسل، تخيل إن في ناس بتحدد قرارات حياتها على الأساس ده بجد؟
لدرجة إن في ناس بتسأل سؤال “أنت برجك إيه؟” من أول مقابلة، ويحددوا على أساسها ياخدوا الضوء الأخضر في العلاقة ولا يهربوا من الأول، ويرموا كل الصفات والكلام والشخصية والعقلية والحياة الاجتماعية وكل ده على جنب، ويحددوا فكر الخص وصفاته على أساس البرج بس.
علميًا، ينفع نربط الأبراج بشخصية الإنسان؟
عالم النفس الأمريكي مارك هاملتون، من جامعة ولاية (كونيتيكت)، بيقول لنا إن الارتباط الإحصائي بين رموز الأبراج والصفات الشخصية يسمح بتقييم الشخص.
وقال تحديدًا: “يحاول علماء النفس تبديد الأوهام التي يطرحها علماء الفلك عن وجود علاقة طبيعية بين صفات الشخص ووقت وموسم ولادته، ولكن يبدو أن هذه العلاقة موجودة فعلًا، أنا لا أقول إنها مرتبطة بالأجرام السماوية، بل أعتقد أن رموز الأبراج ملائمة لتذكر هذه العلاقة الطبيعية من قبل البسطاء من الناس”.
المفروض إن هاملتون توصل للاستنتاج الغريب ده بعد دراسته للصفات الشخصية لأكتر من 300 شخص بيشتغلوا في مجال العروض الفنية ورجال السياسة والعلماء، وقارنها بوقت وموسم ولادتهم.
طبعا علماء كتير انتقدوا فرضية هاملتون، لكن هو بيرد عليهم بإنه هيحاول يرد على انتقاداتهم بمقارنة تواريخ ميلاد وصفات عدد كبير من المشاهير اللي اتولدوا خلال الـ 3 آلاف سنة الأخيرة، والمقارنة دي هتساعده في تأكيد فرضيته أو تنفيها.
طيب لو التجربة اتحققت على مئات الأشخاص، ينفع نعممها على البشر كلهم؟ عمومًا نستنى الأبحاث دي ونشوف.
احنا مش بنتكلم للتشكيك في علم موجود بالفعل، ولا بنتكلم من منظور ديني، كل اللي بنفكر فيه هو إن ماينفعش نفضل نحكم على بعض ونحبس نفسنا واللي حوالينا في قوالب تخلينا نفترض فيهم حاجات مانعرفش هي صح ولا لأ، لمجرد هو اتولد يوم إيه. وماينفعش برضه نبقى بنجاهد ونحاول نخرج من تابوهات اتحطينا فيها من سنين، ونفضل حابسين نفسنا وبنحكم على بعض من غير ما نعرف بعض حتى، ونحكم من تاريخ الميلاد.