قسوة الشتاء مش سهلة، وبرده صعب على الكل، لكن إحنا كبشر سهل علينا نستخدم الدفايات أو ننزل تحت البطانية، وحتى لو ظروفنا الاقتصادية أو الحياتية مش سامحة، فإحنا بخلاف الحيوانات نقدر نستخدم وعينا وإدراكنا ونطوع البيئة لصالحنا. للأسف كتير من الحيوانات المشردة معندهمش القدرة على استخدام الدفاية أو توليع نار، ومعندهمش بطاطين وفي نفس الوقت ميقدروش يبنوا لنفسهم مأوى، عشان كدا كلاب وقطط الشارع دايمًا بينزلوا تحت العربيات أو بيستخبوا في أماكن صغيرة عليهم، وفي الحالتين، فبيكونوا معرضين دايمًا لأذى. Meow Tours وGreenish، بيحاولوا يغيروا الواقع ده.
مؤسسات كتير وبني أدمين أكتر حاولوا قبل كدا يحلوا المشكلة دي، ولكن أي مواد كان بيستخدمها محبي الحيوانات في تشييد مآوي مختلفة للكلاب والقطط يا كانت بتكون ضعيفة فبتتأثر بعوامل الجو أو ذات قيمة فبتتسرق.
Meow Tours قرروا يتعاونوا مع Greenish ويبدأوا مسابقة أونلاين لتجميع أفكار لحلول للمشكلة دي، التقديم فيها هيستمر لحد يوم الأربعاء 3/3. الهدف من وراء المسابقة دي هو إعادة تدوير المواد الموجودة في الشارع المصري بشكل عام واستخدامها في بناء مآوى مختلفة الأحجام للكلاب والقطط، والهدف من وراء إعادة التدوير هو إن كتير من مواد الشارع دي ممكن تكون بدون قيمة فعلية، فهيقلل من نسب السرقة، وبكده ممكن نوصل لمآوي مستدامة موجودة طوال فصل الشتاء.
أما إتكلمنا مع مصطفى عبدالعاطي مؤسس Meow Tours وصاحب المبادرة الجديدة قالنا إن المواد كان دايمًا بتتسرق حتى لو بلاستيك، وإن الحلول الموجودة مش كافية، عشان كدا هو وأعضاء مبادرته مع Greenish في سباق مع الزمن عشان يحاولوا يلاقوا حل للأزمة قبل ما الشتاء ده يخلص، خصوصًا بعد التقلبات الجوية اللي بنشوفها مؤخرًا.
من وسط كل الحلول المتقدمة هيتم اختيار اتنين أو تلاتة وهيتم تجربتهم في مكان معين وعلى أساس التجربة هيتم اعتماد التصاميم المختاره ونشرها أونلاين بحيث يقدر متطوعين في كل مكان في مصر يبنوا المآوي دي في المناطق المختلفة. كمان المبادرتين هيقدموا ورش عمل لتعليم التصاميم دي لمتطوعين من كل أنحاء مصر.
Meow Tours مبادرة مصرية بتحاول توعي بحقوق الحيوانات المشردة وأهميتهم في حياتنا، وبيشجعوا المصريين على الاهتمام بقطط وكلاب الشوارع، وبينظموا زيارات لملاجئهم.
لو عندك فكرة وحاسس إنك تقدر تساعد في مشكلة كبيرة زي دي إبعت إيميل لكل من Meow Tours على meowtoursegypt@gmail.com وGreenish على info@greenishheart.com.