IACES.. من الأنشطة الجامعية المهتمة بقضايا اللاجئين وبتهدف لتغيير العالم للأحسن

من الحاجات الإيجابية اللي بنشوفها في الجامعات والكليات، هو وجود أنشطة للطلاب أو student activities اللي بتكون عادةً عالمية، وده اللي بيدي فرصة للطلاب إنهم يقوموا بمساعدات وأعمال خيرية بالإضافة للتعرف والتواصل مع طلاب من مختلف بلاد العالم، اللي بيتجمعوا تحت مظلة المؤسسات الغير هادفة للربح والأنشطة الطلابية. ومن الأنشطة اللي موجودة في بلاد كتير بجانب مصر، هى IACES اللي من أهم الأنشطة الطلابية اللي موجودة على مستوى عالمي في معظم الجامعات. فتعالوا نعرف أكتر عن النشاط الطلابي وبالأخص الـ “local committee” المتواجدة في القاهرة.

IACES هو اختصار “المنظمة الدولية لطلاب الهندسة المدنية” اللي مش بس مهتمة بعمل علاقات بين طلاب كلية الهندسة من جميع أنحاء العالم علشان ينموا مهارتهم الهندسية، ولكن كمان مهتميين بقضايا مهمة زيّ قضية اللاجئين، اللي بيبذلوا مجهود كبير لحل مشاكلهم ومساعدتهم قدر المستطاع. وفي عز وجود أزمات دولية وعالمية بخصوص اللاجئين والمشاكل اللي بيواجهوها للحصول على أبسط الاحتياجات زيّ الأكل والشرب والسكن الآمن، كان ضروري إننا نسلط الضوء على مشاكلهم وعلى المؤسسات اللي بتسعى علشان تخلي حياتهم أحسن. فعلى النطاق المحلي، بيقوموا بعمل ندوات ومؤتمرات وكمان رحلات ترفيهية علشان يجمعوا بين المتعة والعلم.

أما من خلال مسابقة دولية بينظموها كل سنة واللي بتشمل أسئلة عامة هندسية، وفرق بتقوم بعمل نماذج هندسية لخيم اللاجئين باستخدام software متطور واللي بيفوز النموذج بتاعه، هو اللي بتتاح ليه فرصة السفر والتنافس مع باقي الدول في تركيا. أما السنة دي ونظرًا للظروف اللي بتمر بيها البلاد ومشاكل اللاجئين، فالمسابقة المحلية هتشمل بس كل ما يتعلق باللاجئين وحل مشاكلهم. وبالفعل LC القاهرة فازت في أحد مراحل المسابقة الدولية سنة 2019.

مهم جدًا الالتحاق بأنشطة طلابية تقدر من خلالها تنمية مهاراتك في المجال اللي انت متخصص فيه، وفي نفس الوقت توسيع الأفق في الاهتمام بقضايا كبيرة، تقدر من خلال المنظمة الغير هادفة للربح اللي انت ملتحق بيها، إنك تسيب أثر وتعمل اختلاف، مهما كان دورك بسيط. ده بجانب طبعًا إن أثناء كل المراحل دي، بيتم تعزيز مهارات ومواهب زيّ الـcommunication skills و الـ leadership skills اللي بتفرق في شخصية الإنسان وبتفيده على المدى الطويل.

آخر كلمة: فخورين بـ IACES وأى نشاط طلابي بيحاول يغير العالم للأحسن!

تعليقات
Loading...
Tweet
Share
Share
Pin