بدوي عبد المجيد، مواطن من الأقصر، وصاحب سوبر ماركت في المدينة، قرر أنه يعمل مبادرة بسيطة جدًا من غير أي تكاليف إضافية لمساعدة المحتاجين، والفقراء في مدينته. المبادرة عبارة عن صندوق من البلاستيك صغير حطه في السوبر ماركت بتاعه، ولزق عليه ورقة مكتوب عليها “ضع الخير في صندوق الخير”.
الهدف من الصندوق ده هو إنه يشجع الناس اللي هتدخل تشتري حاجة من السوبر ماركت، يشتروا حاجة زيادة من السلع الغذائية الموجودة، على حسب قدراتهم المادية، ويحطوها في الصندوق علشان الناس المحتاجة تيجي وتاخد اللي هي عايزاه من الصندوق ببلاش. والعمال الوجودين في السوبر ماركت بيراقبوا الصندوق باستمرار، علشان مايتعرضش للسرقة، أو أي مشكلة.
فكرة مبادرة صندوق الخير عجبت سكان وأهالي كتيرة من المنطقة، وفعلًا ابتدوا يقبلوا على السوبر ماركت ده، ويشتروا مأكولات مشروبات مختلفة للصندوق. وقال صاحب الفكرة إنه بيتمنى أن كل أصحاب المحلات يكرروا فكرة صندوق الخير لمساعدة المحتاجين، ولأن كمان دي خطوة ممكن تساعد على نشر طابع التعاون في المجتمع، وفي حياتنا.
آخر كلمة: الدنيا لسة بخير، ولو تقدروا، ممكن تنفذوا الفكرة دي في أي مكان شايفينه مناسب وهيساعد أي شخص محتاج..