القهوة مشروب صباحي أساسي لمعظم الناس، بسبب مفعولها القوي اللي بيخلينا نبدأ يومنا بنشاط وحيوية، وطعمها اللذيذ، وريحتها المميزة. والجميل في القهوة هو إنها مش بس مصدر غني بالكافيين، إحنا ممكن نستخدمها كمان في العناية بالبشرة عن طريق ماسكات القهوة الطبيعية اللي ممكن نستفيد منها بدل الكريمات الصناعية الغالية.
ومن فوائد القهوة للبشرة، احتوائها على مضادات أكسدة كتيرة بتحافظ على الخلايا من التلف، وبنحتاجها لما بنتعرض لأشعة الشمس القوية، أو الدخان، أو التراب، وبتساعد على حماية البشرة من عوامل التلوث. والكافيين اللي في القهوة كمان بيساعد في تخفيف انتفاخ العين، لأنه بيوسع الأوعية الدموية تحت الجلد، فبيجري الدورة الدموية في المنطقة.
ومن ناحية تانية، ماسكات تقشير القهوة بتشيل الخلايا الميتة، وبتمنع تكون البكتيريا، وإحنا جبنالكم خمس وصفات سريعة، وسهلة، ومش مكلفة، تقدروا تستخدموا فيها أي نوع بن عربي.
ماسك القهوة بالعسل
هنحتاج معلقة كبيرة من العسل الأبيض، ومعلقة صغيرة من بودرة القهوة، ونقلبهم سوا لغاية ما الخليط يكون جامد، وندهن بيه بشرتنا. وبعد ما نسيبه لمدة ربع ساعة، هنشيله بغسل البشرة بالمياه، والماسك ده مفيد جدًا للبشرة الدهنية لأنه بيساعد البشرة على امتصاص الدهون.
ماسك القهوة بمياه الورد
هنخلط نص كباية بودرة القهوة مع نص كباية لبن بودرة، بعد كدة هنزود تدريجيًا مياه الورد بكمية مناسبة لغاية ما الخليط يكون متماسك، ونحطه على بشرتنا لمدة ربع ساعة، ونغسله بمياه دافية، وده بيساعد على تنظيف البشرة بعمق.
ماسك القهوة بالليمون
هنحتاج 3 معالق بودرة القهوة، و 3معالق ليمون، ونخلطهم سوا لغاية ما الخليط يجمد، وندهنه على بشرتنا لمدة ربع ساعة ونغسله بالمياه. وده بيساعد على توحيد لون البشرة، والتخلص من البقع الغامقة.
ماسك القهوة وزيت الزيتون
هنحط معلقة كبيرة من بودرة القهوة في فنجان مياه دافية، ونقلب. بعد كدة هنزود معلقتين زيت زيتون، ونقلب كويس، وندهن بشرتنا، ونسيبه لمدة من 7 ل 10 دقايق، ونغسله بمياه دافية. وده للبشرة الجافة، فهو بيساعد على ترطيب البشرة.
ماسك القهوة باللبن
هنحتاج معلقة كبيرة من بودرة القهوة، ومعلقة كبيرة من بودرة الكاكاو، و 3 معالق كبيرة لبن كامل الدسم، وهنخلطهم سوا، وندهن بشرتنا، ونغسله بالمياه. وده بيساعد في تقتيح البشرة.
ممكن كمان نستخدم بواقي البن اللي بتكون في آخر فنجان القهوة بعد مانشربها، وندهنها لوحدها على بشرتنا، وده لأنها بتساعد في علاج الهالات السودة، وتنقية البشرة ونعومتها.
