موتور هي منصة إماراتية متخصصة في خدمة مشاركة السيارات الكهربائية أعلنت امبارح عن إطلاق منصتها لمشاركة السيارات الكهربائية في الإمارات. وده في إطار التزام “موتور” للحد من البصمة الكربونية في المنطقة، وتقديم خيارات علشان الناس تقدر توصل للسيارات الكهربائية، وتوفير حلول الطاقة النظيفة، وبالتالي يقدر العملاء يحددوا مكان العربيات دي ويستأجروها من خلال تطبيق موتور بسهولة ساعة أو حتى سنة كاملة، والناس اللي عندها سيارات تقدر تبيعها برضه على المنصة.
والإطلاق ده جيه بناءًا على ارتفاع أسعار الوقود في العالم كله وسعي والتزام الحكومة بتحويل 20% من أسطولها من السيارات المملوكة للحكومة لبدائل كهربائية.
معظم الدول العربية بتاخد خطوات في إطار مهمتها لمكافحة التغير المناخي عن طريق تحويل السيارات لسيارات كهربائية.. تعالوا نشوف خطوات بعض الدول في عمل سيارات صديقة للبيئة.
مصر
وده بعد رحلة طويلة قطعتها مصر من سنين علشان تصنع عربيات بتمشي بالكهرباء بدل البنزين، وقامت بخطوات ومراحل وصلت في النهاية لتوقيع أول اتفاقية لتصنيع سيارة كهربائية. والسيارة كانت نصر E70، الشركة قدرت إنها تروج للسيارة الكهربائية وحجزوا عشرين واحدة في الوقت ده، وجربتها لمدة ٣ شهور علشان يقدروا يعدلوا فيها قبل الإنتاج الفعلي.
نصر E70 بتشتغل بقوة 147 حصان، والأسعار المبدئية بتوصل ل400 ألف جنيه، ومن المفترض إن يبقى في دعم حكومي علشان يحفز الناس إنهم يشتروها، ده غير إنها لها أنظمة أمان متطورة زيّ ABS, EBD, ESC, BA, TCS, HSA، وفيها مواصفات رفاهية زيّ فتحة السقف والكراسي الكهربائية وشاشة التحكم وتكيف الهواء بتكنولوجيا بلازما. ومن المفترض إنه يتم طرحها في أغسطس 2022.
السعودية
كان حلم بالنسبة للسعودية وبقى حقيقة وخيار مطروح ومتوفر للناس، يعني دلوقتي تقدر بسهولة تحدد أحسن سيارات كهربائية في السعودية وأسعارها ومحطات الشحن، زيّ سيارة MG ZS EV اللي بتعتبر الأكتر طلب وانتشار وBMW i4 2022 وسيارة Audi e-tron GT اللي تُعتبر 496 حصان مع 360 نيوتن. وتقدر من هنا تتعرف على كل مواصفتهم، وإيه أكتر حاجات فيهم مطلوبة أو منتشرة في السعودية، والأسعار بتتراوح مابين 20-280 ألف ريال سعودي.
والانتشار ده جيه بعد إقرار اللائحة التنفيذية وخلوا الاستيراد مش مقتصر بس على الأفراد لأ للوكلاء كمان، وبالتدريج هتحل محل السيارات العادية وتبقى في متناول كل الناس بعد ما كانت اللائحة التنفيذية في 2018 سمحت باستيراد 12 سيارة كهربائية للأفراد.
أما عن اتفاقية أول سيارة كهربائية باستثمار سعودي كانت مع شركة “لوسيِد موتورز” الأمريكية في 17 سبتمبر 2018، والإطلاق التجاري لها كأول مركبة كهربائية في 2020. وفي بداية كلام إن السعودية هتبدأ تدخل في مجال الصناعة بنفسها.
لبنان
في 2021 أطلقت شركة لبنانية أول سيارة كهربائية محلية الصنع بسعر قليل قريب لنص تمن سيارات تسلا الأمريكية الشهيرة بسعر حوالي 30 ألف دولار. كان اسم السيارة دي “القدس راز”، ومؤسس المشروع ومدير شركة “إي في إليكترا” كان رجل الأعمال الفلسطيني المولود في لبنان، جهاد محمد. وكان في كلام إن شركة “إي في إليكترا” هتبدأ بإنتاج حوالي 10 آلاف سيارة هتبقى متوفرة في السوق خلال سنة.
ومؤسس المشروع قال إن أي شخص يقدر يشتري السيارة مقابل إنه يدفع نص تمنها بالدولار والنص التاني بالليرة اللبناني وتقسيط المبلغ الباقي على خمس سنين من غير فوايد.
المغرب
في يونيو 2022، أعلنت المغرب عن سيارات محلية الصنع بنسبة 100%، وتخصيصها لخدمات البريد لتوسيع شبكته في البلد. 225 مركبة كانوا ثمرة شراكة بين “بريد المغرب” و”سيتلانتس” بدعم من وزارة الصناعة والتجارة، وده وفقًا لاتفاقية اتعملت في أكتوبر 2020، وفقًا لكلام الخبير الاقتصادي، رشيد ساري، المغرب بتمتلك حاليًا وبشكل فعلي، نسبة استعمال للطاقة النظيفة بتوصل ل23%، وفي خطط إنهم يوصلوا ل52% سنة 2030.