حالة الكرة الأرضية بتتدهور مع مرور الوقت بسبب التأثيرات والأفعال البشرية المدمرة للبيئة اللي بينتج عنها تدهور التنوع البيولوجي، وزيادة الاحتباس الحراري، وتلوث البحار والأنهار، وحرائق الغابات. ومع تدهور البيئة، زادت حملات إنقاذ البيئة والحفاظ عليها عن طريق إعادة التدوير، واستبدال البلاستيك والمواد الملوثة للبيئة بمواد صديقة للبيئة. وعلشان كده قررنا نجمعلكم مجموعة من أشهر حملات الحفاظ على البيئة، وإعادة التدوير في مصر، وهما:
VeryNile
اتأسست VerNile كمبادرة لتنظيف مياه النيل سنة ٢٠١٨، وهي أول مبادرة عالمية واسعة النطاق لتنظيف النيل بشكل منتظم. المبادرة كبرت وحققت تعاونات كتيرة مع المهتمين بالحفاظ على البيئة في البلد، وليها ٣ أنشطة أساسية بتشمل التنظيف، وإعادة التدوير، والوقاية.
وبتعمل المبادرة حالياً على تطوير وسائل مستدامة لتنظيف نهر النيل، وتدوير النفايات الصلبة من خلال الشراكات مع منظمات محلية، وتقليل الاستعمال الفردي للبلاستيك.
جرينيش
جرينش هي واحدة من شركات التنمية المستدامة المؤسسة لـ VeryNile، أتأسست جرينش سنة 2017 من مجموعة شباب هدفهم نشر التوعية، وتحويل مصر لمجتمع أخضر عن طريق تنظيم حملات للتنظيف، وتصميم وتنفيذ الحلول البيئية المستدامة للشركات، والمدارس، والمنظمات غير الحكومية، والمطاعم.
حملات التوعية والتنظيف اللي قادتها جرينيش شملت محافظات مصر المختلفة زي القاهرة، والأقصر، وشرم الشيخ، والمنيا، والقصير، وبحري في الإسكندرية، ولموا الفترة اللي فاتت أكتر من 3150 كيلوجرام من النفايات.
Urban Earthlings Egypt
أسستها أميرة وهي عندها ٢٠ سنة في سنة ٢٠١٥ بهدف إلهام الآخرين إنهم يغيروا أسلوب حياتهم لأسلوب صديق للبيئة. وعلشان كده قررت تعمل متجر إلكتروني بيهدف لصنع منتجات يومية من مواد معاد تدويرها وصديقة للبيئة زي فرش الأسنان المصنوعة من الخشب، والمفكرات المصنوعة من ورق معاد تدويره، والشنط القماش.
قارورة
قارورة بيصنعوا أزايز مياه بتشبه القلل التقليدية، وتقدروا تستبدلوا الأزايز البلاستيك بيها. وبالإضافة لشكلها المتميز، ومكوناتها الصحية، أزايز قارورة بتحتفظ بدرجة حرارة المياه لمدة ٦ ساعات.
Go Green
Go Green بيقدموا خدمة شراء الورق، والكتب القديمة من الناس وبيعيدوا تدوريها لمكونات تانية مختلفة. كل اللي عليكم تعملوه إنكم تجمعوا الورق والكراتين اللي مش محتاجينهم في البيت، وتتصلوا بيهم، وهيجي مندوبهم لحد عندكم ياخد الورق منكم، وكمان هتاخدوا مقابل عن الورق اللي هتديهولهم.
Banlastic Egypt
المؤسسة دي مقرها في الإسكندرية، وهي بتعالج مشكلة التلوث البلاستيكي من سنة ٢٠١٨، وهدفهم حظر الاستخدام الفردي للبلاستيك، وإنشاء قاعدة من العملاء الواعيين من خلال تقديم ورش العمل، والدورات التدريبية وتنظيف الشواطئ.
وكمان بيحاولوا يتواصلوا مع صناع القوانين واللوائح للمساعدة عن طريق قوانين حظر البلاستيك، وBanlastic كمان بيصنعوا منتجات بديلة للبلاستيك اللي بيستخدم مرة واحدة.
NanoCellulose Egypt Project
المشروع مدعوم من الاتحاد الأوروبي، وهو متخصص في التطوير والإنتاج الفعال من الـ NanoCellulose، اللي بيكون مصنوع من الموارد الطبيعية (النفايات الزراعية) وبيهدف لتحويل النفايات لمواد قيمة، ومستحضرات تجميل، وده بيحمي البيئة من النفايات المُضرة، وبيستغل النفايات بشكل مفيد.