التترات والأغاني اللي بتتعمل وبنشوفها في أي عمل فني بيتم استخدامها لأكتر من غرض، منها الغرض الدرامي اللي بيخلي إنه لازم فريق العمل يقرر يعمل أغنية بتلخص الحدوتة كلها وبيتم استخدامها أحيانًا خلال أحداث المسلسل بشكل يخدم السيناريو وأجواء العمل. وغرض تاني وهو لما بيتم استخدامها لأسباب دعائية وده بقينا نشوفه بطريقتين: إنهم ينزلوا تتر المسلسل قبل ما المسلسل يتعرض بفترة كويسة علشان ياخد حقه في المشاهدة، والغرض الدعائي التاني لما يغني التتر نجوم كبار ومحبوبين وده برضه اللي بقينا نلاحظه مؤخرًا. بقى كل سنة يحصل منافسة على مين هيغني إيه من تترات المسلسلات.
وبجانب ده هنلاقي سواء تترات بيتم استخدامها لغرض درامي أو دعائي بس هتفضل لها بصمة مميزة في كل عمل فني وخصوصًا إن ساعات التترات بتتسمع وبتنجح وبتعلق مع الناس وبتاخد شهرة أكتر من العمل الفني نفسه. وأحيانًا برضه بتكون هي السبب الأساسي إننا نشوف العمل ده أصلًا وبتخلق عندنا حس فضولي “مش بيقولوا الجواب بيبان من عنوانه؟”
وفي الحقيقة صناعة تترات المسلسلات واخدة حقها ولها اهتمام كبير في الدراما المصرية من سنين كتير وكل فترة زمنية لها تتراتها اللي بتميزها. من جيل ليالي الحلمية والمال والبنون لجيل يتربى في عزو وحديث الصباح والمساء لجيل تتر مسلسل بـ 100 وش! وبعد المقدمة الطويلة دي جيه الوقت إنكم تسمعوا أحسن 10 تترات اتعملت في فترة ما بين جيل ليالي الحلمية وجيل بـ 100 وش!