أعلنت وزارة الصحة يوم السبت 1 ديسمبر عن موت 3 أشخاص وتعرض 13 تانيين لجروح خطيرة. الحوادث دي حصلت يوم الجمعة 31 ديسمبر بسبب ظروف الطقس السيئة. واللي خلت الأوضاع مش مستقرة في جهات مختلفة من مصر.

وطبقًا لوزارة الصحة، في شخص واحد مات في محافظة كفر الشيخ بعد ما اتعرض للصعق الكهربائي بسبب أعطال في عمود كهرباء في المطر.
في المنيا وعلى الطريق الصحرواي، قريب من مركز سمالوط، اتقلب ميكروباص واتسبب في مقتل راكب واحد. كمان اتعرض 11 واحد من الركاب لجروح مختلفة في نفس الحادثة. وقالت الوزارة إن الجرحى اتحولوا للمستشفى وبيتلقوا العلاج اللازم.

في حي حلوان في القاهرة، اتعرض شخص واحد للصعق الكهربائي بسبب أعطال في عمود كهرباء في المطر. وكانت النتيجة إنه اتحول للمستشفى في حالة صحية خطيرة وحاليًا بيتلقى العلاج اللازم.
شخص تالت مات في إسكندرية بعد انهيار بيت قديم مكون من دورين. البيت القديم ماقدرش يتحمل المطر الغزير اللي نزل على شوارع الإسكندرية يوم الجمعة وكانت النتيجة وقوع البيت ومقتل واحد من السكان.

وقال المتحدث الرسمي باسم وزارة الصحة خالد عبد الغفار، إن الوزارة كانت مستعدة لحوادث الطقس غير المستقر دي بإنها نسقت مع عربيات الإسعاف علشان تكون استجابتها سريعة. وإنه بالفعل استجابت الإسعاف لحوادث كتير وقدرت تنقذ أرواح كتير في الظروف الصعبة اللي مرت بيها البلد خلال اليومين اللي فاتوا.
وطبقًا لهيئة الأرصاد الجوية المصرية: مصر بتتعرض لموجة من الطقس غير المستقر واللي بتشتمل على أمطار غزيرة ورياح قوية من الخميس 30 ديسمبر للتلات 4 يناير.
وعلى الأساس ده بنحذر كل المواطنين إنهم لازم ياخدوا بالهم خلال الأيام اللي جاية. بالذات أثناء السواقة على الطريق ويا ريت نتجنب الخروج من البيت خلال موجات المطر الغزير والشبورة. وبنحذر من عواميد الإنارة الكهربائية لإنه ممكن يحصل فيها أعطال بسيطة تسبب صعق كهربائي قوي ممكن يوصل لموت حد.