زهرة الكادي حارسة مرمى في المنتخب الإيراني للسيدات عمرها 32 سنة، قدرت إنها تصد ركلات ترجيح واتسببت في تأهل منتخبها لنهائي كأس أسيا، وبسبب أدائها البطولي شكك الفريق المنافس في كونها “رجل ولا ست”! واتقدم الاتحاد الأردني لكرة القدم بشكوى رسمية للاتحاد الآسيوي علشان يتحققوا من جنسها. وقالوا انها مندسة ضمن الفريق الكروي لبلدها. وبعد التحقيقات والتحقق من كونها ست فعلًا، جيه الدور على زهرة الكادي إنها هى كمان تاخد موقف.
فمن وقت حدوث الجدل ده، وفي تعاطف كبير من الناس على السوشيال ميديا اللي اعتبروا إن ده التنمر في أقصى وأوضح صورة. واستنكر كتير من المعلقين ومحللين نفسيين ورياضيين، اللي وضحوا أثر ده على نفسية اللاعبة، ووصفوا المواقف ده أنه أبعد ما يكون عن الروح الرياضية وأخلاقها.
أما حارسة المرمى نفسها، فهى كمان قررت تخرج وتتكلم. فقالت أن اللي حصل ده هو تنمر من الأردن، وإنها هتقاضي الاتحاد الأردني لكرة القدم، بعد ما شككوا في جنسها. وقالت إنها هتاخد الخطوة دي ردًا لاعتبارها وكرامتها، وقالت كمان إن “كل ذنبها انها مش جميلة”. أما مریم إیراندوست مدربة المنتخب الإيراني لكرة القدم للسيدات، فاعتبرت إن طلب الاتحاد الأردني لكرة القدم “مجرد ذريعة لعدم قبول الهزيمة أمام الإيرانيات”.