في تصريح خاص لوزير التربية والتعليم طارق شوقي ووزيرة الهجرة نبيلة مكرم، أعلنوا إن مناهج اللغة العربية والدينية (الإسلامية والمسيحية) ومناهج القيم واحترام الآخر هتبقى متاحة على التطبيق الإلكتروني “اتكلم عربي” في شهر أغسطس.. إيه هو التطبيق وإيه حكايته؟
من شهور قليلة، وزيرة الهجرة نبيلة مكرم أطلقت التطبيق ده بشكل إلكتروني تحت شعار “اتكلم عربي وعيشها مصري” وده بهدف الحفاط على الهوية الوطنية والثقافية لكل الأطفال المصرية برا مصر، وكان الغرض الأساسي من المبادرة دي أشبه بمهمة وطنية علشان نِعَرَف الأطفال لغتهم العربية والمصرية بالتحديد، بجانب تعريفهم بالحضارة المصرية وإنجازات الدولة في المرحلة الراهنة.
وده جيه بعد ما صرحت الوزيرة نبيلة مكرم وقالت: إن كل الشباب المصرية والأطفال برا مصر، بيواجهوا حرب شرسة لطمس الهوية المصرية والعربية، وأكدت إنها مش ضد الانفتاح على الثقافات وتعلم اللغات التانية، هي ضد إن أي شخص عايش برا بلده ينسى لغته الأصلية.
التطبيق بيقدم تجربة معايشة متكاملة للثقافة المصرية للأطفال، ده غير إنه متوفر فيه أحدث الطرق وآليات التعلم، علشان يقدم المعلومة بشكل تفاعلي ومبسط للفئة العمرية المستهدفة، التطبيق بيستهدف في المرحلة الأولى الأطفال من سن 3-6 سنين، والمرحلة التانية من 6-9 سنين، والتالتة من 9-12 سنة وتقدر تحمله من هنا.
وده في إطار التعاون بين وزارة الهجرة ووزير التربية والتعليم، ودار نهضة مصر للنشر لتنفيذ عدد من المشروعات المشتركة في إطار تحقيق أهداف التنمية المستدامة “رؤية مصر 2030”.