مشكلة معظم الناس واللي بيعانوا منها، ازاي يحرقوا سعرات حرارية من غير ما يبقوا مضطريين يروحوا للجيم ولا محتاجين يعملوا رياضة عنيفة، وللسبب ده جبنالكم مجموعة من الأنشطة تقدر تعملها في يومك العادي وفي نفس الوقت تبقى مبسوط.
الرقص
من أكتر الأنشطة اللي ممكن تحرق منها سعرات حرارية، لإن الرقص في الأساس بيعتمد على تحريك كل عضلات وأجزاء الجسم وفي نفس الوقت هتحس إنك بتعمل حاجة مختلفة وبتساعد كمان في تخريج كل الطاقة السلبية.
ركوب العجل
لو ركبت العجل مدة ماتقلش عن 30 دقيقة، ممكن تحرق حوالي 300- 400 سعر حراري، ده غير الفوائد التانية اللي هتعود عليك منه، زيّ زيادة قدرة تحمل عضلات القلب والرئتين، ولو ركبت لمدة ساعة تحرق 1000 سعر حراري، يعني ممكن بالنشاط ده ومع نظام غذائي تستغنى عن مشوار الجيم خالص.
الطبخ
في المطبخ بتعمل أنشطة كتير جدًا، من تقطيع للخضار وتنضيف وطبخ المكونات كل ده بيحرق سعرات، وقيس عليهم كمان إنك بتكرر نفس الأنشطة دي خمس مرات في اليوم بخمس وجبات، ولكن خدوا بالكم تطبخوا حاجات صحية وبسعرات حرارية قليلة.
الشوبينج
في حاجات كتير بتتعمل خلال الشوبينج، سواء المشي أو إنك بتجرب الهدوم، والحاجات اللي بتشيلها، كل ده بيساعد في الحرق، يعني حاجة ممتعة ومسلية وفي نفس الوقت بتحرق منها، فلو عملت شوبينج لمدة 3 أو 5 ساعات ممكن تحرق 1000 سعرة.
المشي
ممكن تكون حاجة بديهية ولكن المشي بيساعد في حرق معدل كبير جدًا من السعرات الحرارية، فممكن تمشي وأنت بتتكلم في التليفون، أو لو قاعد زهقان قوم خد كم لفة كده في البيت، أو انزل امشي تحت البيت شوية، أو لو في مشوار تقدر تاخده على رجلك بدل ما تركبله مواصلات، انزل امشيه، حاجات بسيطة ولكن هتفرق كتير من غير ما تحس إنك بتعمل مجهود.