وسط البلد معروفة من زمان بإن ليها روح مختلفة عن أي مكان تاني، روح شوارعها ومبانيها والمحلات اللي بتفكرك بأيام زمان، هتلاقي فيها محلات عدى عليها أكتر من ربع قرن وبيوت أكتر من نص قرن، جمال بيوت وسط البلد والطراز اللي اتبنت عليه من سنين كتير لسه لحد دلوقتي قادر يسحرك ويخطفك.
الايموبيليا
تعتبر أضخم عمارة في مصر اتبنت سنة 1938 اتقال عليها هرم مصر الرابع، موجودة على ناصية شارع شريف وقصر النيل، فيها أكتر من 370 شقة وصممها المهندس ماكس اذرعى، وجاستون روسي، تم تصميمها على هيئة برجين على شكل حرف “uu” واحد منهم بحري بيتكون من 11 طابق والتاني قبلي وبيتكون من 13 طابق وكل برج ليه تلات مداخل عمومية، مساحتها 5444 متر وفيها جراج يساع 100 عربية، وليها أربع وجهات. وعندها حوالي 27 أسانسير.
العمارة دي سكن فيها مشاهير كتير منهم: نجيب الريحاني في الطابق التالت، محمد عبد الوهاب في الشقة اللي جنب الريحاني وقعد فيها لحد التمانينات، وأنور وجدي وليلى مراد، والفنان محمد فوزي وزوجته، ومحمود المليجي والمخرج هنرى بركات، وتوفيق الحكيم بس سابها لما ازدحمت بالسكان.
جروبي
عمارة جروبي موجودة في قلب الميدان، يعتبر من أشهر ميادين مصر وهو ميدان طلعت حرب، أسسها السويسري جاك جروبي، سبب شهرة العمارة دي مش بس علشان تاريخها أو شكلها، لأ دي علشان الشهرة اللي بيمتلكها كافيه جروبي اللي يعتبر من أشهر كافيهات العصر الحديث واللي اتصمم على الطراز الفرنسي، و تم تصوير فيه أكتر من فيلم وكانوا بيعملوا جوا الكافيه حفلات كتير ثقافية، عمارة جروبي فيها الطابع الأوروبي والنكهة المصرية وده يمكن أكتر حاجة بتميزها.
يعقوبيان
عمارة أسسها المليونير هاغوب يعقوبيان عميد الجالية الأرمنية سنة 1937، واتبنت على طراز الفن الزخرفي (الآرت ديكو)، سكن فيها شخصيات من أماكن وديانات وأعراق مختلفة ولكن بعد ثورة 1952 اتحولت لملكية ضباط الجيش، سبب شهرة العمارة دي لما قرر الكاتب علاء الأسواني يكتب عنها رواية على نفس اسمها، وبعدها الرواية اتحولت لفيلم سينمائي وحقق نجاح كبير وقت عرضه.
الشواربي
تعتبر من أضخم وأفخم عمارات القاهرة، مجمع سكني صممه واحد من أشهر مهندسين القاهرة وهو شارل حبيب، اتبنت سنة 1925 وموجودة على تقاطع شارع 26 يوليو ورمسيس بوسط البلد، المبنى بيتمز بزخارف على شكل تمثال أبو الهول، واتسمت بالاسم ده نسبة لعائلة شهيرة جت مصر مع عمرو بن العاص، واتقال انها قامت بعشرات الأعمال الخيرية والوطنية والسياسية في حق مصر.
بهلر
عمارة اتبنت 1924، عمارة وممر بهلر اللي بيحمل نفس الاسم يعتبر نسخة مصغرة من شارع مشهور في باريس، بتتكون من 6 مباني شبه منفصلة وكل منها مدخل خاص بعدد 130 شقة فاخرة، أما الدور الأرضي اتعمل 72 محل مستقل، يعتبر ممر بهلر من أشهر الممرات التجارية في وسط البلد وبيفصل بين شارع قصر النيل وطلعت حرب.
وأنت ماشي في وسط البلد هتحس إنك قدام متحف مفتوح لتاريخ الحضارات في عصورها المختلفة، هتحس كإنك ماشي في صورة مصر المصغرة اللي بتشوف فيها فن وتاريخ.