فريدة (لينا صوفيا) في مسلسل كامل العدد معذبة نفسها ومعذبانا معاها! الجمهور بقى عامل حملات توعية وبيترجاها: “يا بنتي خدي سيف، ابن ناس ومتربي، وسيبك من علي!”… بس لا حياة لمن تنادي، قلبها واخدها برجليها نحية الكارثة.
المصيبة إن علي لسه طالع في حياتها امبارح! لا مؤاخذة، دخل بمبدأ اتمسكن لحد ما اتمكن، وبقدرة قادر بقى فتى الأحلام، رغم إنه المثال الحي للـ Bad boy بكل تفاصيله.
سؤالنا هنا بقى: إيه الحكاية؟ ليه البنات بتنجذب للباد بوي؟ هل سرهم في الكاريزما؟ ولا في الأدرينالين اللي بيحسّسهم إنهم عايشين فيلم أكشن؟ ولا الحكاية فيها تحدي وحب للمعاناة؟ شاركونا رأيكم، لأن الموضوع ده واضح إنه ملوش نهاية!
لا تفوّت قراءة: أقوى إعلانات خطفت قلوبنا في أول يوم رمضان.. سحر المشاعر ولمّة الأحباب!
بتقول بصوت عالي “I Can Fix him”
جملة “I Can Fix Him” مشهورة على السوشيال ميديا، وسبب انتشارها إنها معمولة مخصوص للـ باد بويز.
البنت بتبقى شايفة نفسها مختلفة، عندها تحدي إنها الوحيدة اللي هتقدر تغيّره.
بتصدق إنه جواه حاجة كويسة، بس مستني البنت الصح تطلعها منه. لكن الحقيقة؟ كل ده أوهام وأحلام!
الواد دمه خفيف!
مش عارفة إيه السر، بس أغلب الباد بويز عندهم خفة دم غريبة إفيهات جاهزة، نكت مرسومة بالمسطرة، وكأنها موهبة فطرية عندهم.
وطبعًا، أي بنت بتضعف قدام اللي بيضحّكها. وزي ما قالت ياسمين صبري لما سألوها: “حبّيتيه ليه؟” ردّت ببساطة: “بيضحكني”!
لافف وداير.. بس هيتغير عشاني!
في مبدأ غريب عند البنات، مش عارفين جابوه منين، إن الولد اللي شاف وعاش وجرب كل حاجة، هييجي عندها ويهدى.
هتحوّله من المستكشف المغامر لـ زوج مثالي وأب حنون، هيبقى رجل بيتوتي يسمع كلام مراته!
وعلى العكس، الولد اللي ماكانش ليه في العلاقات، أول ما يرتبط يبدأ يلف ويدور، وكأنه بيعوّض اللي فاته!
كتالوج الرومانسية والنحنحة جاهز
في بنات مش عايزة تعلّم الراجل الرومانسية، عايزة واحد جاهز بالكلام الحلو والردود المحفوظة.
وهنا ييجي الباد بوي، معاه كتالوج كامل، يعرف إزاي يدخل من أضعف نقطة.
وده غالبًا بيوقع البنات قليلة الخبرة، اللي ممكن تدوب مع أول نحنحة، حتى لو كانت بستايل أحمد رمزي!
البنات بتحب الـمطقطق!
وسط الكبت والقيود اللي عايشين فيها بنات كتير، الباد بوي بيبقى المتنفس. أفكاره مجنونة، تصرفاته متهورة، ويخطفها لأماكن عمرها ما كانت تحلم بيها.
مش زي اللي ينام بدري علشان عنده شغل الصبح! وعلى رأي ميس إنشراح في “الناظر”: “أنا عايزة واحد مطقطق كده!”
لا تفوّت قراءة: بعد جدل ظهورها في مسلسل معاوية.. ماذا نعرف عن هند بنت عتبة والدة معاوية بن أبي سفيان؟
واثق في نفسه.. لدرجة الغرور!
الباد بوي عنده كاريزما ووسامة، بيروح الجيم كتير، فاتح زراير القميص والسلسلة لازم تبان!
الثقة دي بتخطف بعض البنات، لحد ما تتحوّل لغرور بزيادة. وده اللي بيوقعهم في شِبَاكه بسهولة، لأنه دايمًا واثق إنه محبوب!
ماشي بأسلوب “أنا بحبك وعارف إنك هتحبيني”.. طب وعلى إيه الفرهدة بقى؟
مش بيستسلم .. هوصلك حتى لو عارف إني ممكن أموت!
الباد بوي مش سهل يستسلم، عنده حتة تملك غريبة، وهدفه دايمًا يوصل للبنت بأي طريقة.
محاولات، مؤامرات، خناقات، وتكسير الدنيا، كل ده عادي بالنسباله! ممكن ياخد كورس بس علشان يقابلها، أو يقتحم شغلها ويعملها فضيحة!
وده مش بس بيجذب البنات، ده بيخليها تدوب في دباديبه، وعلى رأي مصطفى قمر: “يا ناس أنا دوبت في دباديبو.. دباديوو!”