في حفلة اختتام دورة مهرجان القاهرة السينمائي الدولي الـ 42، بيكون احتفال مميز لإنه بيكون آخر يوم وبيخلص خلاص، فبنشوف أحلى الإطلالات والأزياء من الفساتين والبِدل، ولكن اللحظات اللي علقت معانا أكتر وهنفضل فاكرينها للمهرجان السنة الجاية هي المواقف اللي بتحصل من الفنانين والمشاهير على السجادة الحمراء، وفي الحفلة، سواء حركة اتعملت، أو كلمة اتقالت، أو لحظة رومانسية ما بين اتنين أو وجود قطة على الريد كاربت ده لوحده حاجة مش مألوفة.. فتعالوا نشوف إيه اللحظات اللي حصلت في اختتام المهرجان وهنفضل نفتكره بيها.
محمد فراج وبسنت شوقي
من أجمل اللحظات اللي حصلت على السجادة الحمراء في اختتام مهرجان القاهرة إن ماكنتش في أسبوع المهرجان كله، محمد فراج عدل وظبط للجميلة بسنت شوقي ديل فستانها، ونظراتهم لبعض كلها حب من غير أي اصطناع.
سارة عبد الرحمن
قطة المهرجان المشهورة اللي موجودة من أول يوم، واللي تقريبًا من أحلى الحاجات اللي حصلت السنة دي في مهرجان القاهرة السينمائي، راحت تلعب مع الفنانة الجميلة سارة عبد الرحمن، والجميل إن سارة عبد الرحمن ردت عليها وقررت تلعب معاها، وتقريبًا هي أول حد في المهرجان يتفاعل معاها بجد.
مصطفى عباس
الفنان مصطفى عباس ظهر على الريد كاربت بصورة من مشهد من فيلم “أبو علي” للفنان الكبير كريم عبد العزيز، اللي كلنا أكيد فاكرينه، واللي بيقول فيه “مفيش حاجة تفرقنا عن بعض أبدًا ياعمري أنا”.
أحمد الفيشاوي
الفيشاوي جمعته لحظات رومانسية مع مراته ندى كامل، ولكن اللي لفتنا ليه أكتر حركاته أو رقصه اللي عمله على السجادة الحمراء.
أحمد حاتم
قلع أحمد حاتم جاكيت البدلة علشان يورينا كلمة مكتوبة على القميص وهي كلمة “عاشق”، وهو اسم فيلمه الجديد مع المنتج أحمد السبكي.
لبلبة
لبلبة الجميلة ضحكتنا كلنا وهي بتعاكس رئيس لجنة التحكيم بعد ما فاجئها ببوكيه ورد، وقعدت تقول “دا فيها جوازة دي ولا إيه”، واللي خلى الجمهور كله يموت من الضحك، وليلى علوي قالتلها “هزغرطلك”.