أعلنت وزارة الصحة المصرية عن خطتها للتعايش مع فيروس الكورونا (كوفيد-19) في الفترة اللي جاية، و حددت 5 جهات مش هترجع للعمل لحد ما تنتهي أزمة الفيروس. الأماكن دي بتشمل الأماكن الترفيهية زي دور السينما والمسارح والقهاوي والكافيهات. والمطاعم هتفضل معتمدة في شغلها على توصيل الطلبات فقط، والجامعات والمدارس وحضانات الأطفال هتفضل مُغلقة، ده بالإضافة لصالات الجيم والنوادي الرياضية والاستراحات المغلقة بالأندية، وإقامة الأفراح والجنازات وغيرها من المناسبات اللي بيكون فيها تجمعات هتفضل ممنوعة.
وللتعايش مع الفيروس والحد من إنتشاره، أعلنت الوزارة مجموعة من الإجراءات المطلوب اتباعها بالنسبة للأفراد والمؤسسات على حد سواء زي الفرز البصري والشفوي وقياس الحرارة لجميع الأشخاص قبل دخولهم المنشآت والمترو والقطارات، وإلزام جميع المواطنين بارتداء الكمامة عند الخروج من البيت. وخطة التعايش دي هيتم تنفيذها على 3 مراحل وهي:
1- مرحلة الإجراءات المشددة: المرحلة دي هيتم تطبيقها فوراً، والهدف من تطبيقها هو تفادي اي نوع من الانتكاسة. ومن ضمن الإجراءات المتبعة فيها، الحفاظ على كثافة منخفضة داخل المنشآت والمحال التجارية، تخصيص عربة كاملة لكبار السن والحوامل في المترو، وتخصيص مقاعد خاصة إضافية لكبار السن والحوامل في جميع وسائل النقل الأخرى. وفي حالة وجود مريض بأعراض بسيطة يقدر يتواصل مع 105 والطبيب لو كان من الفئات عالية الخطورة، ولو كان مش من ضمن الفئات دي يبقى هيتم عزله في في البيت، وهيتبع إرشادات العزل لحد ما يتخلص من كل الأعراض، أو أي علامة بتدل على تطور الأعراض المرضية عنده زي استمرار ارتفاع الحرارة لمدة تزيد عن 3 أيام، وضيق في التنفس، وألم شديد بالصدر يعيق التنفس، ونهجان أثناء الراحة، وعلامات الجفاف، وتشنجات (خاصةً الأطفال)، واضطراب الوعي، كحمة مدممة (ودي بتحصل نادرا).
المرحلة دي هتستمر لحد ما يكون في نقص في إجمالي أعداد المصابين لأسبوعين متتاليين على مستوى الجمهورية.
2- مرحلة الإجراءات المتوسطة ودي هيتم تطبيقها لمدة 28 يوم من انتهاء مرحلة الإجراءات المشددة. والمرحلة دي بتشمل الحفاظ على كثافة متوسطة داخل المنشآت والمحال التجارية، وده بالإضافة لمجموعة من الإجراءات الاحترازية المُتبعة في المرحلة الأولى.
3- مرحلة الإجراءات المُخففة والمرحلة دي هتبدأ بعد الإجراءات المتوسطة، وهتستمر لحين انتهاء ازمة الفيروس أو صدور قرارات أخرى مُنظمة ليها. وهنا هيتم الالتزام بالتهوية الجيدة، ومنع أي نوع من التزاحم، واتباع أساليب النظافة العامة، وفي حالة وجود توصيات من منظمة الصحة العالمية باعتماد لقاح آمن وفعال، هيتم البدء في تلقي اللقاح حسب الأولويات اللي هتصدرها وزارة الصحة والسكان.
وبالإضافة للإرشادات العامة، حددت الوزارة على مدار الثلاث مراحل مجموعة من الإجراءات والقواعد المُنظمة اللي هتلتزم بيها كل المؤسسات والمنشأت الحكومية والخاصة ووسائل المواصلات، وهيتم الإشراف عليها ومراقبة تنفيذها.