بعد انتقادات طالت جيل الألفية وتعليقات لا تنتهي من الأهالي والأقارب “انتوا مش فالحين” “مش نافعين ببصلة”، “ابقوا قابلونا لو فلحتوا” وبعد جمل التنمر إن الجيل مش عارف يحوش قرشين لمستقبله، ظهرت دراسة لوكالة العقارات البريطانية “نايت فرانك”، علشان تنصف الجيل المظلوم وتقول أنه “في طريقه ليصبح أغنى جيل في التاريخ”.
لو أنت مختلط عليك مين هما جيل الألفية فأحب أقولك اللي اتولدوا بين 1981 و2000 هما اللي معانا ولكن قبل وبعد لأ مش معانا، وهما دول اللي قالت عليهم الدراسة هيحققوا مكاسب غير متوقعة على مدى العشرين سنة اللي جايين، وبيرجع ده في المقام الأول إلى الأصول العقارية اللي اتراكمت لدى الأجيال اللي سبقتهم.
ووجدت الدراسة أن 75% من جيل الألفية يتوقعون زيادة ثرواتهم في عام 2024، مقابل 53% في جيل طفرة المواليد (الجيل اللي اتولد بين عامي 1946 و1964)، و56% في الجيل X (1965 إلى 1980) و69% في الجيل الأصغر سنًا، الجيل Z.
جيل الألفية مر بأزمات كتير من أهمها الأزمات الاقتصادية، منها انهيار عام 2008 والأزمة الاقتصادية المصاحبة بسبب جائحة كورونا، والحرب الروسية الأوكرانية وكل ده داس على وش الجيل، ولكن ترجع لنا الدراسة وتدي الجيل الجائزة الأولى.
آخر كلمة: ماتفوتوش قراءة: موقع مراهنات يستغل صور مشاهير بالذكاء الاصطناعي للترويج لمنصته