منصة “اكسب” صاحبة أبلكيشن اكسب، وده تطبيق لكل ما يخص الكره القدم، ومن خلال التطبيق اللعيبة يقدروا يتوقعوا نتايج مباريات كرة القدم على الهواء مباشرة، واللي بيتوقع صح بيكسب جوايز مختلفة زيّ بلايستيشن 4، أو تيشيرتات أصلية لأكبر الأندية العالمية، والمنصة مقرها القاهرة، وقدرت تجمع 500 ألف دولار من 4XD ventures، ودي شركة استثمار بتركز على الشركات الناشئة في أفريقيا وبتدعمها، بالإضافة لمستثمرين وشركاء من بيئة الرياضة والترفيه الدولية.
منصة اكسب اتأسست في 2017، على إيد علي محمود، وبينضم المتسابقين من خلال الأبلكيشن لتوقع نتايج الماتشات وتجميع النقاط في حالة التوقع الصح، وبعدها بيكسبوا جوايز أو مبالغ نقدية، يعني مثلًا لو اخترت تشجع صلاح و توقعت إنه هيجيب جول في الماتش اللي بيتلعب وقتها، وده اتحقق، هتجمع نقط على توقعك الصح، سواء ده كان للاعبين أو أندية.
علي محمود المؤسس لشركة اكسب، بيقول إن المسابقات دي صناعة بتقدّر بمليارات الدولارات سنويًا، وإن هدفه هو إن شركته تبقى الأولى في مجالها بمنطقة الشرق الأوسط وأفريقيا، من خلال تنظيم المسابقات، وده كمان إضافة لتقديم محتوى رياضي محلي جذاب، خصوصًا إن الرياضة في الشرق الأوسط من أكتر الحاجات اللي ليها شعبية كبيرة، بالذات كرة القدم، وليها قاعدة جماهيرية كبيرة، كان لازم استغلالها في مشاريع ومسابقات مميزة ومختلفة.