مين فينا مابيحبش أسكندرية وجوها اللي في صيفها وفي شتاها مابنقدرش نقاومها، فأسكندرية مشهورة بإنها أحلى المصايف اللي تطلعها مع عيلتك، وفي الشتا بتخطفلك يوم أو اتنين من الويك إند مع صحابك وتروحوا تقضوا وقت حلو وذكريات جميلة، لكن أي قعدة حلوة مابتكملش غير بالأكل والتحلية بعد الأكل فجبنالكم أحلى وأشهر اللأماكن اللي لازم تزوروها لما تسافروا أسكندرية.
كلنا عارفين طبعًا كبدة الفلاح اللي كبدته مفيش زيها، وألبان سويسرا اللي أكله مميز ومناسب لأي وجبة في اليوم، وبلبع ملك المشويات، ومحمد أحمد اللي فطاره بيشبعك اليوم كله.. فتعالوا نتعرف على مطاعم تانية بنفس الجودة، والجمال.
فطير القلاع
من أحسن الأماكن اللي بتعمل فطير في أسكندرية إن ماكنش في مصر كلها، وكل اللي جربه كان مبهور من حلاوة الفطير، وتلاقي عنده الحلو والحادق، وهو موجود في سيدي جابر، ونقدر نعرف طريقه من هنا.
مشاوي أنور مسعود
وده موجود في العطارين، ونقدر نعرف مكانه بالظبط من هنا، وهو معروف إن جودة الأكل بتاعه حلو جدًا، واللي دايمًا بيكون طازة.
الشيخ وفيق
حلويات الشيخ وفيق في حتة تانية خالص، فلو عايز تحلي بعد أي أكلة في أسكندرية، مش هتحتار خالص محتاج لإن أكيد هتروح الشيخ وفيق اللي بيعمل كنافة، وأم علي، ورز بلبن بالمكسرات بالأيس كريم، وحاجات تانية كتير فوق الوصف، أكيد مادوقتش زيها قبل كده.. المكان موجود في رأس التين ونقدر نروحه من هنا.
جيلاتي مكرم
جيلاتي مكرم من أقدم محلات الآيس كريم في أسكندرية، ومعروف بحلاوة طعمه، وجودته العالية، وخدمته الممتازة.. وهو موجود في المنتزه، ونقدر نشوف طريقه من هنا.
أسماك عبده فرج
مينفعش تكون في أسكندرية ومتأكلش سمك، ومن أشهر الأماكن هناك أسماك عبدع فرج، وهو معروف إن السمك طازة.. وموجود في رأس التين، ونقدر نروحه من هنا.
مشويات جيمي
موجود في سيدي جابر، ونقدر نعرف طريقه من هنا، وهو من أحسن المطاعم اللي بتقدم مشويات في أسكندرية، ومعروف إن خدمته ممتازة وأكله لذيذ.
عصائر طلعت
موجود في التمرازية، ونقدر نروحه من هنا. ومعروف بمشاريبه الحلوة، وأسعاره مناسبة.
سندوتشات فرج أبو خالد
موجود في شارع السيد محمد كريم، ونقدر نعرف طريقه من هنا، ومعروف بأنواع الكبدة الكتير، وهنلاقي فيه كل أنواع السندوتشات اللي عايزينها من اللحوم.