8 أغاني دينية تحسسنا بجو رمضان 

رمضان هل هلاله والشهر الكريم له جوه وريحه اللي بيختلف من حد لتاني؛ في اللي رمضان بالنسبة له هو جو اللمة والأكل والحكاوي اللي مابتخلصش، وفي اللي بيحب أصناف الأكل والحلو اللي بتبقى مخصوصة بس لرمضان، بس كلنا بنتفق على الجو الديني الهادي اللي بيريح النفس والأعصاب. وسواء كنت بتمارس كل العادات الدينية لرمضان، فرض وسنة ونوافل، أو بتؤدي اللي عليك بس، ما نقدرش ننكر إن كلنا رمضان مربوط عندنا بأصوات حلوة وعذبة، سواء في قراءة القرآن أو أغاني دينية بتقربنا بكلماتها وأصوات مغنينها لربنا وبتريح نفسيتنا. وعلشان كده، دي لسته بأحلى الأغاني الدينية والصوفية اللي ممكن تدخلنا في جو وموود رمضان. 

ممكن نسمي الأغاني دي صوفية أو أشعار في الحب الإلهي، بترجع تاريخيًا لبداية ظهور التصوف في القرن التاني الهجري. لكن أيًا كان أصلها وتاريخها، مانقدرش ننكر جمالها وقدرتها على إنها تدخلنا في حالة روحية جميلة. 

برضاك 

موال ديني، كلمات بيرم التونسي وألحان زكريا أحمد وغناء كوكبة الشرق أم كلثوم، صوت أم كلثوم كإنه معمول علشان لون المواويل. من شهرة الموال ده، كتير غنوه من أشهرهم في اليوم الحاضر “مروة ناجي“، اللي نسختها من الأغنية مع فرقة كايروستيبس فيها قوة في الأداء وحلاوة في الصوت مش بس اللي يحسسنا بجو رمضان، لكن كمان يعيد مجد الموال ده لوقتنا الحالي.

عرفت الهوى 

من أشهر قصائد الحب الإلهي، من أشعار رابعة العدوية اللي تعتبر رمز للتفاني في حب الله في التاريخ العربي الإسلامي. غنتها أم كلثوم مع مجموعة أغاني تانية بنفس الطابع الديني لفيلم “رابعة العدوية”. بس “عرفت الهوى” اتشهرت من بينهم بسبب صوت أم كلثوم المتفرد وعمق معنى كلمات القصيدة، وهي من ألحان رياض السنباطي.

يا مالكًا قدري 

كلمات الشاعر المصري كمال عمار، والقصيدة ككل لها لون صوفي لطيف بيعبر عن ضعف المخلوق أمام الخالق واحتياجه الدائم له. المغزى بقى في الأداء الغنائي بين الشيخ إيهاب يونس وفرقة كايروستيبس، اللي بيجمعوا الغربي والشرقي كموسيقى، وتحديدًا موسيقى الجاز الغربي والموسيقى الكلاسيكسة الشرقية. الأغنية بتنقلنا لحالة من الهدوء والخشوع مناسبة جدًا للشهر الكريم.

لبيك لبيك يا سري ونجوائي 

قصيدة أكتر من رائعة في الحب الإلهي للحلاج اللي هو أشهر شعراء العصر العباسي في التاريخ الإسلامي، ومعروفة بقصيدة التلبية. مش مشهورة كغنا في وسط الأغاني المشهورة، بس هي مشهورة أكتر في حلقات الذكر أو “السماع” بين الصوفيين. الأغنية فيها من السنة كتير زي التلبية للحج والعمرة، وتعبتر من كلاسيكيات التصوف العربي. 

طالما أشكو غرامي

أنشودة صوفية حوليها جدل كتير في الأوساط الدينية، لكن بعيدًا عن الجدل، أداء المنشد الدمشقي نور الدين خورشيد ليها بيخليها آية في الجمال وبيوصل معناها السامي في الرغبة الشديدة من القرب لله وحب الرسول وتعالميه. 

نسيمي

ما ينفعش ليسته أغاني وأناشيد دينية من غير سامي يوسف، وبالأخص أغنية نسيمي باللغة الأذربيجانية. قصيدة للشاعر عماد الدين نسيمي، أداها المنشد الديني المشهور، في وطنا العربي، سامي يوسف، مع أروركيسترا في افتتاحية هيئة التراث لليونسكو في دورتها ال43.

الكلمات عميقة جدًا والموسيقى كتوزيع وآلات سحرية وتلمس الروح بشكل مناسب جدًا لشهر رمضان. 

مدد

الترجمة العربية لقصيدة نسيمي، مناسبة للمجتمع العربي من حيث عدم إثارة الجدل، بتغير الكلمات والمعاني علشان تناسب قيم المجتمع والتقاليد الإسلامية، مع المحافظة على الأداء المسرحي المبهر اللي بيحرك المشاعر والأحاسيس للخشوع والتفكير في حب الله وعظمة قدرته. مدد من أحلى الحاجات اللي قدمها سامي يوسف. 

قصر شيرفان شاه 

مقطوعة موسيقية بدون كلمات من توزيع سامي يوسف برضه وأداء نفس أوركسترا نسيمي. الموسيقى ملحمية بشكل مش طبيعي وبتحرك المشاعر بشكل غريب، حتى بدون كلمات أو غنا سماعها بينقلك لعالم تاني، وبيحسسك إنك بعيد عن الدنيا ومادياتها. 

وفي الآخر، مهما كان الاختلاف في القرب من ربنا والتعبير عن الحب أو الخوف منه، لازم نفتكر إن في الآخر كلنا واحد والرب واحد، ومن غير اختلافنا في التفكير فيه والارتباط الروحاني به ماكناش عرفناه. وبما إننا في رمضان، وكلنا بنطلب المغفرة من ربنا فيه وبنحاول نسامح ونصفي نيتنا تجاه الناس، لما نسمع الأناشيد والأغاني الدينية بتاعة ثقافتنا والثقافات التانية ونتعرف على نظرتهم لربنا، ممكن نلاقي جوانا التسامح والتقبل للآخر. ونستغل رمضان ده في توسيع مداركنا والرقي بأرواحنا. 

آخر كلمة: ما تفوتوش قراءة: دويتوهات هنشوفها مع بعض لأول مرة في مسلسلات رمضان 2022

تعليقات
Loading...
Tweet
Share
Share
Pin