أفلام السينما المصرية بتتحفر في وجدان المشاهد من كل أنحاء العالم العربي، علشان أي مشاهد من أي حتة في الوطن العربي بيقدر يشوف نفسه في الأفلام المصرية اللي بتعبر عن الإنسان بكل عيوبه وغلطاته والحاجات الحلوة اللي فيه، بتعمل خليط كده من حاجات جميلة بتلمسنا كلنا.
وعلشان كده في أفلام مصري كتير مهما عدى عليها الزمن وبقت قديمة هنفضل نتفرج عليها كل شوية ونستمتع بيها برضه علشان مش بنزهق منها أبدًا.. وفي المقال ده جبنالكم 6 أفلام مصرية من زمن فات علشان نفكركم بيها ونفكركم ليه كلنا بنعشقها.
فيلم الناظر: واحد من أحلى الأفلام المصرية اللي اتعملت في التاريخ
الفيلم ده جمع مجموعة كبيرة من أجمل نجوم الكوميديا في السينما المصرية من علاء ولي الدين وأحمد حلمي ومحمد سعد وحنان الطويل وحسن حسني، وفنانين تاني كُبار ومهمين أوي.
قصة الفيلم المهمة وميكس الكوميديا الخفيف واللي كان جاي من كل ناحية وفي كل مشهد خلى الفيلم ده واحد من أكتر الأفلام المميزة في السينما المصرية.
فيلم ثقافي
واحد من الأفلام اللي ناقشت قضية مهمة أوي من قضايا الشباب في الوقت ده، وعلشان الفيلم عرف يناقش قضية الإباحية والحرمان الجنسي عند الشباب المصري بذكاء وخفة دم في الفيلم ده، قدر يوصل الفكرة للشعب المتدين بطبعه من غير ما يخليه يثور على الفيلم وصناعه.
وكمان الفيلم جمع كوكبة كبيرة من نجوم السينما المصرية في بداية حياتهم المهنية زيّ أحمد عيد، وفتحي عبدالوهاب، وأحمد رزق، وضيوف الشرف الكُبار اللي أضافوا كتير للفيلم.
أصحاب ولا بزنس
واحد من أفلام مصرية قليلة في وقتها ناقشت قضية البزنس ما بين الصحاب وتأثيره على علاقتهم والخناقات اللي ممكن تحصل بسببه.
أغنية مصطفى قمر “أصحاب أنا وأنت ولا”، علقت مع كل الناس ولسه اللحن والكلمات بترن في ودنك دلوقتي. جمع الفيلم نجوم كُبار كانوا برضه وقتها شباب في بداية حياتهم كممثلين زيّ مصطفى قمر، وهاني سلامة، وعمرو واكد، وطارق عبدالعزيز، ونور اللبنانية.
حب البنات
فيلم حب البنات واحد من الأفلام المصرية القليلة اللي ظهرت في الوقت ده وكانت بطولتها نسائية مطلقة، جمع ما بين الجميلة ليلى علوي، وحنان تُرك، وهنا شيحة، مع الفنان الكوميدي المميز أشرف عبدالباقي.
الطريقة اللي ناقش الفيلم فيها العلاقات العاطفية ومفاهيم الحب الرومانسي والحب ما بين الأخوات، وعلاقات الأخوات والمشاكل اللي بتحصل ما بينهم لمستنا كلنا، علشان جمع عيلة وخلانا نحس بمشاعرهم.
الباشا تلميذ
كريم عبدالعزيز، وغادة عادل، وحسن حسني، وخالد الصاوي. يعني أحلى مجموعة ممكن تعمل فيلم مع بعض. وعلشان الفيلم جمع ما بين الكوميديا والرومانسية والأكشن وحياة شباب الجامعة في الوقت ده، فالشباب وقتها اتعلقوا بيه أوي. ومش الشباب بس. كلنا لسه بنحبه وعمرنا ما نزهق منه.
حريم كريم
مصطفى قمر، الشاب الجميل القمر، أبو عيون ملونة وصوت جميل مع ياسمين عبدالعزيز، وعلا غانم، وريهام عبدالغفور، وداليا البحيري، وبسمة حسن، وكل دول معاهم طلعت زكريا. يعني ميكس مضمون النجاح وفيلم داخلينه واحنا عارفين إن الكوميديا للركب.